Arritja deri në fazën gjysmëfinale të Champions League kanë mbushur arkat e klubit italian të Romës.
Verdhekuqtë nuk arritën të shkojnë në finalen e Kievit, duke u eliminuar me rezultatin e përgjithshëm 7-6 nga Liverpooli, që më 26 maj do të sfidojë Realin e Madridit për trofeun me “veshë të mëdhenj”.
Megjithatë, romanët kanë fituar thuajse 100 milionë euro nga ndeshja e Ligës së Kampionëve këtë sezon, ku sipas “Calcio e Finanza”, rreth 81 milionë euro vijnë nga UEFA dhe rreth 18.2 milionë euro nga biletat e shitura në stadiumin mitik “Olimpico”, të cilat kanë një vlerë totale rreth 99.2 milion euro.
Kjo do të thotë që për herë të parë që nga sezoni 2012-2013, Juventusi nuk do të jetë klubi më i mirë italian që fiton në Europë.
Bardhezinjtë u eliminuan nga Real Madrid në çerekfinale dhe gjatë këtij sezoni në Champions League kanë fituar një total prej 91.8 milion euro.
