Të paktën 76 persona kanë humbur jetën dhe dhjetëra të tjerë janë lënduar në stuhitë e ashpra të rërës që goditën shtetet veriore të Indisë në Rajasthan dhe Uttar Pradesh.
Stuhitë bënë që të ndërpritej energjia elektrike, pemët të shkuleshin me rrënjë, shkatërruan shtëpi dhe vranë bagëti. Shumë nga viktimat ishin në gjumë kur shtëpitë e tyre u shembën pasi u goditën nga rrufetë.
Stuhitë e rërës janë të zakonshme në këtë pjesë të Indisë gjatë verës, por humbja e jetëve në këtë shkallë, është e pazakontë. Stuhitë kanë prekur rëndë tre rajone në Rajasthan, Alvar, Bharatpur dhe Dholpur, ku të paktën 31 persona kanë humbur jetën.
Qeveria ka bërë të ditur se familjet e viktimave do të kompensohen. 45 persona humbën jetën në Utar Pradesh, 36 prej të cilëve vetëm në rajonin Agra, ku ndodhet edhe monumenti i Taj Mahalit.
Zyrtarët besojnë se bilanci do të rëndohet akoma më shumë. Stuhia ka goditur edhe kryeqytetin Delhi, më shumë se 100 km larg, shoqëruar me shira të rrëmbyeshëm gjatë mbrëmjes së të mërkurës.
