Minatorët janë ngritur në protestë sërish ditën e sotme në ambientet e jashtme të Kuvendit duke shprehur pakënaqësinë e tyre përmes thirrjeve si “Turp” dhe “E paçi haram votën”.
Ata kërkojnë miratimin e statusit të tyre në Kuvend, si dhe përmirësimin e kushteve të punës. Nëse nuk marrin asnjë reagim brenda këtij afati, ata kanë paralajmëruar se do të kalojnë në grevë urie për të shprehur më tej pakënaqësinë e tyre.
Kreu i Grupit parlamentar të PD-së Gazment Bardhi ka deklaruar se do të dorëzojë ditën e nesërme në Kuvend projektligjin për Statusin e Minatorit.
“Dua t’iu informoj se pasi një pjesë e kolegëve kanë patur mundësi ti takojnë minatorët dhe gjatë ditës së djeshme është firmosur projektligji për statusin e minatorit dhe ditën e neserme do të dorëzohet zyrtarisht në kuvendin e Shqipërisë. Pra kërkesa e protestuesve që kanë disa javë që vijnë para parlamentit janë dëgjuar nga Grupi Parlamentar i PD dhe çdo kërkesë e tyre është përkthyer në një projekt ligj që është firmosur nga një pjesë e kolegëve dhe nesër dorëzohet ne kuvend”– tha Bardhi.
