Ushtria izraelite ka akuzuar gjashtë gazetarë të Al Jazeera, që mbulojnë luftën në Gaza, se ishin luftëtarë aktualë me pagesë ose të mëparshëm të grupeve militante palestineze, por rrjeti mediatik i mohon pretendimet.
Izraeli e mbështet akuzën ndaj gazetarëve tek dokumente, për të cilat tha se i kishte zbuluar në Gaza dhe elementë të tjerë të grumbulluara nga agjencitë e zbulimit. Të gjithë gazetarët janë meshkuj palestinezë. Sipas Izraelit, katër prej tyre janë të lidhur me Hamasin dhe dy të tjerë me Xhihadin Islamik Palestinez.
Gazetarët Anas al-Sharif, Hossam Shabat, Ismael Abu Omar dhe Talal Arrouki akuzohet për lidhje me Hamasin ndërsa Ashraf Saraj dhe Alaa Salameh akuzohen si të lidhur me Xhihadin Islamik.
Al Jazeera tha se akuzat ishin të sajuara dhe “pjesë e një modeli më të gjerë armiqësie” ndaj rrjetit pan-arab. Rrjeti mediatik tha se pretendimet ishin “një përpjekje e hapur për të mbyllur gojën e paktë gazetarëve të mbetur në rajon, duke errësuar kështu realitetin e ashpër të luftës nga audienca në mbarë botën”.
Al Jazeera e ka selinë në Katar, ku janë vendosur shumë zyrtarë të lartë të Hamasit. Vendi arab i Gjirit, i cili financon Al Jazeera, ka qenë gjithashtu një lojtar kyç në negociatat e armëpushimit në Gaza, së bashku me SHBA-në dhe Egjiptin.
Komiteti për Mbrojtjen e Gazetarëve lëshoi një deklaratë të mërkurën që ishte kritike ndaj Izraelit, i cili tha se “ka bërë vazhdimisht pretendime të ngjashme të paprovuara pa prodhuar prova të besueshme”.
