Marcelo pranoi se topi e preku dorën e tij brenda zonës së penalltisë, në mes të ankesave të Bayern Munich, pasi Real Madridi arriti në finalen e tretë radhazi të Ligës së Kampionëve. “Los Blancos” e rezervuan biletën e vet në finalen e Kievit në sajë të një barazimi 2-2 në ndeshjen e dytë gjysmëfinale, të luajtur mbrëmë në “Santiago Bernabeu”. Gjiganti spanjoll përparoi më tej falë rezultatit total 4-3.
Suksesi nuk ka qenë pa polemika në kryeqytetin spanjoll, pas anësori i majtë i Real Madridit, Marcelo ishte me fat që nuk u penalizua me penallti për prekje të topit me dorë, në gjysmën e kohës së rregullt. Me barazimin momental 1-1, Joshua Kimmich, i cili hapi rezultatin në minutën e tretë, e krosoi topin për në zonën vendëse, por “sfera” u pëngua nga krahu i djathtë i Marcelos. Qartësisht penallti, por jo për kryesorin turk, Cakir.
Ankesat dhe pretendimet e bavarezëve në këtë rast ranë në veshë të shurdhër. “Nëse ju them se topi nuk e ka prekur dorën time, atëherë tregohem gënjeshtar”, – tha Marcelo. Karim Benzema luajti një rol të madh për Real Madridin, duke realizuar një dopietë, megjithëse ishte portieri i Bayernit, Sven Ulreich, ai që ia dhuroi golin e dytë.
Heroi i ndeshjes ishte portieri kostarikan i madrilenëve, që evitoi gola të sigurtë me pritjet e tij. Gjë të cilën e evidenton edhe Marcelo: “Unë jam shumë i lumtur për Keylor dhe Karim. Ata e meritonin të kishin një ndeshje të tillë. Futbolli ndonjëherë është i vështirë, ju jeni mirë dhe dështoni. Sidoqoftë, unë jam i lumtur për ta”.
