Kreu i PD-së së Gjirokastrës, Roland Bejko ka folur në lidhje me përplasjet që po ndodhin brenda partisë më të madhe të opozitës.
Përballë gazetarit Alen Xhelili, Bejko është shprehur se, këto persona apo grupe të vogla kanë thjeshtë qejfmbejtje personale dhe nuk kanë asnjë program apo alternativë.
‘Ish-figura të larta të PD-së e kanë një çështje personale me kreun e PD-së. Statusi është shkaku për të ndërtuar parimin e tyre, një përplasje me Lulzim Bashën. E kam ndjekur me vëmendje debatin e zhvilluar me individë apo grupe të vogla në PD’, u shpreh Bejko.
Kryedemokrati i Gjirokastrës tha se, ‘nuk kam parë shumë përmbajtje në deklaratat e tyre për statusin, e nuk kanë qenë shumë serioz. Këto janë grupet më të dobëta të dalë nga PD, krahasuar me vitet e mëparshme, si mocionistët, grupin e Kalakulës, në 1997, Dash Shehin etj., në 1999 Genc Pollon etj., kanë pasur ide e programe politike dhe i kanë mbrojtur këto’.
‘Në ditët e sotme, shikojmë se më tepër debatet janë inatçore, për qejfmbejtje personale, për emrat në listat e deputetëve.
Ka rotacione dhe askush nuk është i përjetshëm. PD aktualisht ka një qarkullim elitash dhe këto nuk bëhen pa zhurmë. Basha e ka pranuar që ka bërë gabime dhe ka shtrirë dorën për ti hyrë garës në vota’, u shpreh në studion e SYRI.net, Ronald Bejko, kryetar i PD-së së Gjirokastrës.
