Humbja përballë Kukësit natyrisht që ishte ana negative për mbrëmjen e së dielës, por ka qenë një ditë e mbushur me lajme pozitive për kampin bardhekuq. Kjo për vetë faktin se katër lojtarë të Skënderbeut janë nën vëzhgimin e agjentëve të huaj të merkatos.
Bëhet fjalë pikërisht për Fidan Alitin, Gledi Micin, Enis Gavazajn dhe Sabjen Lilajn, të cilët në stadium ditën e diel kanë pasur të ftuar të veçantë disa menaxherë të ekipeve në Superligën belge. Të ndodhur pranë menaxherit Shkumbin Qormemeti, katër vëzhguesit e klubeve belge kanë ndjekur nga afër lojën e futbollistëve të Skënderbeut për të nxjerrë një konkluzion më të saktë se çfarë mund të shohin përmes videove.
Përshtypjet deri diku për të katërt lojtarët duket se kanë qenë pozitive, bëjnë me dije burime pranë klubit për “Panorama Sport”, por sigurisht që qartazi duke iu referuar lojës së prodhuar nga lojtarët në fushë pritshmëritë më të larta i ka mbushur Fidan Aliti. Me paraqitjen pozitive të bërë nga mbrojtësi kosovar i Skënderbeut duket se ka lënë përshtypje të mira për menaxherët e huaj. Sigurisht që kjo është një shenjë e mirë, jo vetëm për katër lojtarët në fjalë, por edhe për klubin e Skënderbeut që ka mundësinë për të mbushur sërish arkat nga shitja e kartonit të lojtarëve.
BISEDIMET
Gjithsesi, pavarësisht interesimit të shumtë për lojtarët e Skënderbeut, duket se nuk ka nisur asnjë tratativë për futbollistët në fjalë. Palët janë ende në vëzhgim e sipër teksa kjo ka qenë vetëm një nga “vizitat” e shumta që këta menaxherë do të bëjnë pranë klubit bardhekuq deri në përfundim të sezonit për të ndjekur nga afër lojtarët.
Mbetet një mundësi e mirë gjithsesi, por bisedimet zyrtare me klubin nuk pritet të fillojnë më shpejt se sa mbyllja e kampionatit. Pasi sezoni të këtë përfunduar, atëherë do të shihet diçka më shumë në lidhje me këtë çështje. Vetëm atëherë pritet që Skënderbeu dhe drejtuesit e klubit, pasi të marrin sinjalin për interesimin zyrtar rreth futbollistëve të tyre, të vendosin edhe kushtet e kontratës në lidhje me këto transferime.
