Në edicionin e kësaj të shtune të “Real People”, Ruzhdi Qarri, një 72-vjeçar nga Gjakova, ndau pasionin e tij si zdrukthëtar, duke rrëfyer historinë e familjes së tij që është e njohur për këtë zanat për breza të tërë.
Një temë e veçantë në bisedë ishte vendimi i Ruzhdiut për të mos u angazhuar në punën për ceremoni mortore.
“Nuk punoj për ceremoni mortore, punon vëllai im. As fëmijët e mi nuk deshën, edhe pse ka para. Nuk kam dashur të merrem me atë zanat. Është punë e ftohtë. Unë jam njeri i qeshur, nuk mund të merrem me atë zanat, u tërhoqa,” tha ai.
Megjithatë, Ruzhdiu vazhdon të punojë çdo ditë në punishten e tij, duke krijuar objekte prej druri që reflektojnë mjeshtërinë dhe artin e zdrukthëtarisë.
Ruzhdiu shpjegoi se zanati i tij është një traditë që ka kaluar nga gjenerata në gjeneratë. “Daja i gjyshit tim, gjyshi, babai dhe tani unë, të gjithë kemi punuar si zdrukthëtarë,” tha ai.
Pavarësisht nga pasioni dhe përkushtimi i tij, ai e pranon se shumë njerëz në komunitet e kanë braktisur këtë profesion, duke e lënë zdrukthëtarinë në një gjendje të brishtë.
“Ky është një zanat në zhdukje e sipër. Shumë zanatlinj e lanë këtë zanat. Disa kanë vdekur, dhe djemtë e tyre nuk kanë mundur ta trashëgojnë këtë profesion,” shpjegoi Ruzhdiu.
