Universiteti Swansea dhe The Sunday Times, përmes një studimi të kryer, kanë arritur në përfundimin se llogaritë ruse në Twitter kanë dërguar mesazhe në mbështetje të partisë opozitare në Britani, duke tentuar të ndikojnë në zgjedhjet e vitit të kaluar.
Studimi ka zbuluar se rreth 6,500 llogari të automatizuara kanë dërguar mesazhe në mbështetje të liderit të partisë së Laburistëve, Jeremy Corbyn dhe politikave të tij pak para mbajtjes së zgjedhjeve.
Po të njëjtat llogari kanë sulmuar edhe kryeministren Theresa May, lidhur me refuzimin e saj për të marrë pjesë në një debat televiziv. Gjithashtu e kanë kritikuar atë për zvogëlimin e numrit të forcave policore pasi sulmit me bombë në Mançester.
Sipas përfundimeve të studimit, nëntë nga 10 mesazhet e dërguara kanë mbështetur Partinë Laburiste.
“Këto gjetje janë jashtëzakonisht shqetësuese”, ka thënë përmes një deklarate ministri britanik i Kulturës, Matt Hancock.
Në vijim, ai shtoi se: “Është absolutisht e papranueshme për çdo komb që të tentojë të ndërhyjë në zgjedhjet demokratike të një shteti tjetër”.
Qeveria britanike ka akuzuar Rusinë për ndërhyrje në zgjedhjet në gjithë botën dhe për krijimin e lajmeve të rreme në media.
