29-vjeçari Enea Thomaraj humbi jetën sot në spitalin e Traumës, pas tre muajsh në gjendje të rëndë, teksa konsiderohet si viktimë e pafajshme e një shpërthimi me tritol që ndodhi më 14 Korrik në qytetin e Elbasanit.
Ai ishte fqinj i motrave Xhovana dhe Alda Nikolli, të cilat ishin shënjestër e atentatit me tritol. Enea Thomaraj ishte duke shkuar në tualet në momentin që ndodhi shpërthimi me tritol, dhe si pasojë e shpërthimit të fortë, dera e banesës së tij u shemb dhe i shkaktoi dëmtime të rënda në kokë.
Motrat Alda dhe Xhovana Nikollakuzuan Nuredin Dumanin për krimin, megjithatë, ende sot nuk është zbardhur ngjarja dhe nuk janë identifikuar autorët.
Fqinjët e viktimës në një prononcim për mediat e përshkruajnë të riun për mediat si “një djalë i mirë dhe që ndihmonte familjen e tij”. Sipas tyre, motratat Nikolli pas ngjarjes janë larguar në Turqi.
“Shumë e dhimbshme. Të jetë tjetri në shtëpinë e vet dhe të gjejë vdekjen… Ka vuajtur 2-3 muaj në gjendje kome. S’e gjetën autorin, ato dy femrat ku ikën? Ato ikën në Turqi, nuk jetojnë më këtu”, tha një nga fqinjët.
“S’e besonim që do ndodhte kjo gjë. Çun babaxhan nga të gjitha anët. Ai e mbante shtëpinë, njëri pa fjalë. Të jesh në shtëpinë tënde të ndodhi kjo… katastrofë. S’ka më keq. Autori nuk është kapur akoma, ja shteti jonë”, tha fqinji.
“Mjerë ai që e pëson, nga i keqi e pëson i miri. Keq na vjen shumë, djalë i ri. Mjerë nëna dhe baba”, u shpreh një tjetër.
“Në prek shumë si ngjarje, çfarë të thuash. M’u mpi trupi”, thotë një nga fqinjët.
