Dy turistë të huaj, njëri belg dhe tjetri anglez rezultojnë të kenë parë direkt shpërthimin e fuqishëm të tritolit që ndodhi mbrëmjen e 24 qershorit 2024, në basenin ujor të Portit të Sarandës, ku mbeti i vdekur në vend Armand Nelaj.
Atë mbrëmje, Nelaj kishte hyrë në ujë me qëllim për të vendosur tritol tek njëra nga anijet e dy vëllezërve Ilirjan Qirjako dhe Vasillaq Qirjako, që zotërojnë kompaninë detare “Finikas Sh.p.k”.
Por një pakujdesi e vogël, ka bërë që atij t’i plasë tritoli në dorë, duke i shkaktuar vdekjen e menjëhershme.
Tashmë për këtë çështje është arrestuar dhe mbahet në burg Erdion Muho, ndaj të cilit është ngritur akuza e “Shkatërimit të pronës me eksploziv” mbetur në tentative. Muho rezulton të jetë miku i ngushtë i viktimës Armand Nelaj.
E gjithë ngjarja është parë nga dy turistë të huaj, belgu Frederic Rousseaux dhe anglezi Nicholas Mçann.
“Ora News” ka mësuar se dy turistët ishin dy personat e fundit që biseduan me Nelaj, dhe pak sekonda pas bisedës në varkën e tij shpërtheu tritoli, duke i marë jetën në mënyrë të menjëhershme.
Të huajt i kanë thënë policisë se ndodheshin rastësisht në vendin e ngjarjes dhe kishin shkuar për ta ndihmuar Armand Nelaj, por pasi janë larguar disa sekonda më pas kanë dëgjuar një shpërthim shumë të fortë.
Aty kanë parë se Nelaj i kishte ikur një pjesë e kafkës.
“…Jemi afruar për të parë se çfarë kishte ndodhur dhe kemi parë sende që po pluskonin mbi ujë.
Personi që pamë në ujë i kishte ikur një pjesë e kafkës dhe i kishte dalë supi…”-tregojnë.
Dy turistët kishin ankoruar varkën e tyre tek porti i Sarandës dhe në mbrëmje po qëndronin në varkë.
Teksa qëndronin në varkë, me dylbi kanë parë një person që po vishej në tokë për të hyrë në det.
“…afër zyrës së emigracionit, kemi vënë re një person i cili po vishte kostumin e zhytjes.
Ne e kemi parë me dylbi që po vishej, por varka nuk lëvizte. Varka kishte ngjyrë të zezë si në gri dhe dukej se kishte një mbishkrim “forcë”.
Pastaj jemi afruar tek varka e tij dhe kemi vënë re që ai ishte zhytur në ujë dhe po vinte rrotull varkës, tek pjesa e pasme e varkës, aty ku ndodhet motorri dhe po tërhiqte dy çata të zeza, të cilat pluskonin mbi ujë…”-kanë treguar dy turistët.
Sipas të huajve, kur kaluan afër tij me gomone e pyetën, se mos donte ndihmë, por ai diçka fryu me gojë dhe ju tha të iknin. Pas disa sekondash u dëgjua një shpërthim ku sipas tyre mund të ishte bombël oksigjeni.
“…pasi po tërhiqte dy çanta me ngjyrë të zezë, ai u përgjigj se ishte në rregull dhe ne jemi larguar. Personi nuk kishte shumë dëshirë të fliste me ne, madje me maskë nëpër dhëmbë na ka folur.
Disa metra më tutje, pasi jemi larguar pas disa sekondash kemi dëgjuar një shpërthim shumë të fortë.
Jemi afruar për të parë se çfarë kishte ndodhur dhe kemi parë sende që po pluskonin mbi ujë. Personi që pamë i kishte ikur një pjesë e kafkës dhe i kishte dalë supi.
Më pas e kemi tërhequr me varkën dhe e kemi nxjerrë në breg ku janë afruar edhe punonjësit e portit për të na ndihmuar…”-dëshmojnë dy turistët e huaj të cilët u pyetën në komisariatin e Sarandës.
/Ora News
