E ndërsa u zbuluan se kush janë grabitësit të cilët vranë pak ditë më parë 52-vjeçarin Agim Buci dhe plagosën gruan e tij, Gazeta Shqiptare ka zbuluar të tjera detaje. Ndërkaq, mësohet se polumbarët vijojnë kërkimet në lumin e Tiranës për gjetjen e pistoletës së përdorur në krim.
Vladimir Kurti dhe Ruzhdi Hodo kanë pranuar të dy krimin para policisë. Plani ishte ideuar nga Kurti, i cili jeton pranë banesës së familjes Buci në rrugën “Besëlidhja në Kamëz.
28-vjeçari me origjinë nga Burreli e kishte piketuar këtë dyqan, pasi kishte parë se në mbrëmje aty kishte pak lëvizje dhe pak ndriçim dhe zakonisht shërbente vetëm gruaja. Kjo pasi bashkëshorti i saj punonte në një kompani interneti. Kurti kërkoi ndihmën e shokut të tij Ruzhdi Hode, i cili jeton në periferi të Kamzës.
Hodo kishte për detyrë të mbështeste në veprime Kurtin dhe të bënte transportin me mjetin e tij Volsëagen. “Ladi, më tha hajde me mua marrim çfarë të gjejmë dhe i ndajmë bashkë. Unë vetëm e çova me makinë nuk kam asnjë faj. Nuk e dija se do të qëllonte”, – ka thënë Ruzhdi Hodo.
