Antonio Griezmann, në një prononcim për median pas ndeshjes së djeshme ka konfirmuar se është në bisedime me Atletico Madrid për të ardhmen e tij.
Ylli francez shënoi golin e barazimit në minutën e 82-të ndaj Arsenal, në kuadër të gjysmëfinales së parë të Ligës së Evropës.
Gjigantët madrilenë arritën të merrnin barazim 1-1 në “Emirates Stadium” edhe pse luajtën me një lojtar më pak për 80 minuta. Pas daljes me karton të kuq të Sime Vrsaljko, i cili në minutën e 2-të u ndëshkua nga gjyqtari me karton të verdhë, por vetëm tetë minuta më pas mori të dytin, duke lënë skuadrën me një lojtar më pak.
Pavarësisht disavantazhit në numër lojtarësh, skuadra e Diego Simeone, ia doli të marrë një rezultat pozitiv për ndeshjen e kthimit që do të luhet javën që vjen në “Wanda Metropolitano”.
27-vjeçari është nën kontratë me bardhekuqtë deri në vitin 2022, por së fundmi flitet për një transferim të mundshëm në merkaton e verës në “Camp Nou”.
Pas ndeshjes, në një intervistë për “COPE”, Griezmann tha: “Nuk e di nëse do të vazhdoj te Atletico, nuk e di, do të shohim. Jam në diskutime me drejtuesit e klubit, do të shohim se çfarë do të bëhet”.
Atletico i detyrohet për atë barazim, portierit Jan Oblak, i cili bëri pritje të shkëlqyera duke mos e lejuar sulmin e “Topcinjve” që të kalojë zonën e tij.
Përveç daljes me të kuq të Sime, edhe Diego Simeone u ndëshkua nga arbitri pas protestave të shumta dhe u detyrua që të largohej nga pankina.
Pas golit të avantazhit të shënuar nga Alexandre Lacazette në minutën e 60-të të takimit, gardiani slloven pati rolin kryesor në skuadër, ku largoi disa raste të rrezikshme nga porta.
Griezmann nuk nguroi që t’a komplimentojë shokun e tij të skuadrës për paraqitjen mahnitëse që bëri në Londër mbrëmjen e djeshme.
“Jan është më i miri në botë për momentin. Jo, se është shoku im i ekipit, por për shkak të pritjeve që ai bën, pikët që ka fituar për ne. Fillimi i lojës ishte tejet i çmendur, shumë gjëra ndodhën. Tani kemi një ndeshje të dytë të mirë që duhet të bëjmë në shtëpi. Shpresoj që tifozët të krijojnë një atmosferë të çmendur, sepse ata duan të na shohin në finale. Ne e kemi fituar Europa League. Tani, presim një atmosferë euforike në Wanda Metropolitano”- përfundoi 26-vjeçari.
