Ka ndërruar jetë në moshën 44-vjeçare ish-deputeti i Partisë Demokratike, Gerti Bogdani.
Burime bëjnë me dije se ai ka pësuar arrest kardiak, teksa ndodhej në ambientet e hotelit “Rogner” në Tiranë.
Bogdani është dërguar me urgjencë në spital, ku ka mbërritur me puls 0 dhe është futur menjëherë në intubim, por nuk ka arritur dot të mbijetojë.
Lajmin e trishtë e ka bërë me dije edhe kreu i grupit parlamentar të PD-së, Gazment Bardhi gjatë mbledhjes së konferencës së Kryetarëve. Mbledhja më pas është ndërprerë, pasi deputetët janë larguar menjëherë nga salla, teksa do të vazhdojë në një moment të dytë.
Gerti Bogdani ishte i martuar me aktivisten e njohur Edlira Çepani dhe është babai i dy fëmijëve, Ajrës dhe Reinartit.
Bogdani i kishte përfunduar studimet e larta në Universitetin Politeknik të New York-ut me rezultate të larta dhe karrierën politike e filloi në vitin 2007, ku kandidon me Partinë Demokratike për Kryetar të Njësisë Bashkiake nr. 10 Tiranë, garë të cilën e fiton. Gjate kësaj kohe vazhdon edhe aktivitetin si zëdhënës politik i PD.
Në vitin 2009 deri në vitin 2015, Gerti Bogdani, kandidoi në zgjedhjet parlamentare të 28 qershorit 2009, dhe u zgjodh deputeti më i ri në Kuvendin e Shqipërisë. Nga viti 2009 e në vijim, ai vazhdoi aktivitetin e tij si Kryetar i Forumit Rinor të Partisë Demokratike.
Deputet ai ka qenë për dy legjislatura nga viti 2009 deri në vitin 2017, teksa në vitin 2022 garoi si kandidat në primaret e Partisë Demokratike për të qenë kandidat për Bashkinë e Tiranës.
Mbi vdekjen e Gerti Bogdanit ka dalë me një komunikatë edhe Policia e Tiranës, e cila konfirmon se ai është gjetur pa ndjenja në ambientet e hotelit dhe ka ndërruar jetë në spital.
“Më datë 18.09.2024, rreth orës 11:30, në ambientet e një hoteli në bulevardin “Dëshmorët e Kombit”, është gjetur pa ndjenja shtetasi G. B., 45 vjeç. Ky shtetas është transportuar në spital për ndihmë mjekësore, por ka ndërruar jetë.
Nga veprimet e kryera paraprakisht dyshohet se vdekja ka ardhur për shkaqe natyrale. Grupi hetimor po punon për sqarimin e rrethanave të ngjarjes.” – thuhet në njoftimin e Policisë.
