Komisioni Organizativ i Protestës për taksën në rrugën e kombit,Këshilli Bashkiak Kukës dhe Shoqata “Biznesi për Biznesin” në një konferencë për mediat të enjten pasdite denoncoi disa kërcënime deri në përndjekje fizike përmes sms-ve drejtuar anëtarëve të komisionit.
Kërcënimet kanë ardhur si reagim për kundërshtimet për taksën zero,negociatat e qeverisë me konçensionarin për tarifa lehtësuese si dhe protestave të zhvilluara.
“Duke marrë shkasë nga disa veprime përndjekëse dhe kërcënuese të ndodhura ditët e fundit ndaj anëtarëve të komisionit të protestës për Rrugën e Kombit, theksojmë se veprime të tilla të turpshme vetëm sa na bëjmë më kurajoz në qëndrimet tona të drejta për banorët e Kukësit. I bëj thirrje organeve përkatëse të kryejnë detyrimet e tyre ligjore. Kërcënimet kanë ardhur me SMS dhe deri tek përndjekjet fizike. Natyrisht ne kemi marrë hapat ligjor për denoncimin e tyre.
Ndërkohë komisioni organizativ theksoi se do të vijojnë të jenë në krye të nismave kundërshtuese për negociatat që qeveria po bën me konçensionarin të cilët i cilësojnë provokim çdo tarifë për lëvizjen në Rrugën e Kombit.
Më 31 mars, banorë të qarkut të Kukësit protestuan dhe dogjën traun e pagesës në Rrugën e Kombit, akt që çoi 23 persona në pranga, katër nga të cilët janë ende në qeli. Aktualisht në Rrugën e Kombit po kalohet pa pagesë, ndërsa qeveria nisi negociatat me koncesionarin, me të cilin ka firmosur kontratën”,- ka thënë Sokol Kolgjini, shoqata “Biznesi për Biznesin”.
