Tirana sonte në mbrëmje ka testin më të vështirë në këtë fillim kampionati. Bardheblutë duhet të përballen me Egnatian kampione në fuqi dhe të fitojë ndeshjen.
Jo vetëm për prestigj, por sepse në dy javë ka luajtur mirë, por ka marrë vetëm dy pikë dhe normalisht duhet të jetë lart në renditje.
Bledi Shkëmbi, numri një i pankinës së Tiranës iu përgjigj pyetjeve të gazetarëve para ndeshjes me kampionët e Shqipërisë.
“Gjendja e grupit është e mirë, gjithçka ka shkuar mirë gjatë javës, për fat të mirë nuk kemi pasur probleme, veç se ata që dihen, Përgjoni dhe Meta. Në përgjithësi skuadra është ok dhe shpresoj që të jenë në maksimum.
Egnatia është kampione e Shqipërisë në fuqi edhe këtë vit e ka nisur mirë, ne jemi të qartë me kë skuadër luajmë, forcën e saj, kemi respekt për lojtarët dhe gjithçka që ka bërë vitet e fundit. Patjetër që mendojmë të bëjmë më të mirën, kemi përgatitur ndeshjen, shpresojmë të kemi edhe fatin”, tha Shkëmbi.
Kujtojmë që Tirana është pritëse kundër Egnatias, por ndeshjen do ta luajë në Durrës në stadiumin “Niko Dovana” duke filluar nga ora 20:00.
