Për kryeministrin nuk ka rëndësi brumi, por shfaqja, mënyra si dukesh te tjetri, jo si mund të jetë në të vërtetë. Këtë e ka bërë më së miri në arenën ndërkombëtare. Gjatë pasdites së sotme kryeministri Rama u prit nga Kancelarja Gjermane Angela Merkel në një ceremoni zyrtare. Qëllimi i takimit është lobimi për të bindur Gjermaninë për të miratuar në Bundestag hapjen e negociatave për Shqipërinë në muajin qershor. Ndonëse një pjesë e vendeve të BE-së kanë shprehur që tani idenë e hapjes së negaciatave që Shqipëria të jetë si vend kandidat për në familjen e madhe, të “zotët” e vërtetë të shtëpisë janë në dilemë.
Gjermania, Franca dhe Holanda janë tre vendet skeptike për hapjen e negociatave për Shqipërinë. Përpos takimit me Merkel, Kryeministri Rama do të shkojë edhe në Bundestagun gjerman, institucioni që do të marrë vendimin për hapjen ose jo të negociatave. Në Bundestag është planifikuar një seancë bashkëbisedimi mes Kryeministrit dhe Komisionit të Jashtëm në Bundestag, që drejtohet nga Gunther Krichbaum, i cili është një emër i njohur, pasi ka përplasur Ramën dhe Bashën në akuza pas dhënies së rekomandimit pozitiv. Para Krichbaum Rama do qëndrojë si I zënë në faj, pasi nuk është se ka me vete armatën e deputetëve të PS-së që nhuk lanë formë pa iu kundërvënë. Në Gjermani dhe vende të tjera në Europë, Rama sillet si “lider botëror”, të paktën në spektin komunikues, tentativë për imponim, apo një politikani me “vizion”. Por Gjermani, Franca dhe Holanda e njohin më mirë se Rama të vërtetat e shqipërisë
Çdo ditë këto vende përplasen me fluksin e madh të emigrantëve shqiptarë që kërkojnë azil, për shkak të kushteve të rënda ekonomike. Nga ana tjetër, Holanda prej më shumë se një viti ka ngritur alarmin se grupët kriminale shqiptare janë fuqizuar së tepërmi, sidomos pas kanabizimit të Shqipërisë në vitin 2016. Korrupsioni mbetet në nivele mjaft të larta dhe në këtë pikë Rama vetë nuk ka në duar asnjë raport konkret, që ti tregojë Europës që qeveria e drejtuar prej tija ta ketë seriozisht luftën kundër korrupsionit, përkundrazi, thellohet gjithnjë e më shumë. Për më tepër që institucionet finaciare botërore janë shprehur edhe kundër PPP-ve të famshme të qeverisë, ose ndryshe konçensionet, që tashmë janë një “mierë ari” me abuzime të pastra nga ana e qeverisë sonë.
Megjithë këtë mal të madh mbi supe, Rama tenton të dalë krenar në vendet e BE-së, duke kërkuar me forcë se Shqipëria e meriton hapjen e negociatave. Ndërkohë, ka luajtur taktikisht duke u shprehur se nëse Europa i mbyll dyert, atëherë Shqipëria mund të hedhë sytë e madje mund të kthehet në “plaçkë të lakmueshme” nga Rusia, Turqia, apo Kina. Por me këto kërcënime kryeministri ynë nuk shkon dot gjatë, pasi kuptohet qartë se është një blof minor, që vende si Shqipëria nuk mund të kenë asnjë ndikim në gjeostrategjinë Europiane.
Kudo ku shkon Rama mundohet të bie në sy. Edhe atëherë kur nuk ka çtë thotë, tenton që me veshje apo gjeste të përbëjë lajm, që në këtë rast më shumë shkon për mediat e “showbiz”. Por ai do pyetet për punët e Shqipërisë, aty ku kryeministri nuk ka çtë rrëfejë, pasi kancelaritë europiane nuk janë si takimet e tij me administratën tonë, që jetojnë në Shqipërinë iluzive që u tregon kryeministri.
