Është përkeqësuar gjatë mbrëmjes së djeshme situata nga zjarri në Malin e Thatë. Flakët e zjarrit vijojnë të përhapen, duke zgjeruar sipërfaqen e djegur jo vetëm në brendësi të Parkut Kombëtar të Prespës, por ka kaluar në anën tjetër të Malit të Thatë mbi fshatin Peshkëpi të Bashkisë Pogradec duke rrezikuar djegien e sipërfaqeve të mëdha me bimësi të ulët.
Burime zyrtare bëjnë me dije se ditën e djeshme ka pasur një angazhim të shtuar te forcave për izolimin e flakëve brenda Parkut Kombëtar, por sipas shërbimit zjarrfikës e vetmja mënyrë për fikjen e zjarreve është ndërhyrja nga ajri, e cila ka munguar prej dy ditësh.
Burime jo zyrtare thanë se vetëm pas dy ditësh pritet ndërhyrja nga ajri nëpërmjet helikopterëve grek dhe atij bullgar, pas kërkesave zyrtare drejtuar këtyre dy vendeve.
Nga ana e Maqedonisë së Veriut zjarri është riaktivizuar ndaj dhe për këtë shërbimi zjarrfikës e ka të pamundur të vijë në ndihmë për shuarjen e flakëve në Parkun Kombëtar të Prespës.
