Vatrat e zjarrit vijojnë të djegin masivin pyjor në kurorën mbi Delvinë. Pylli me pemë, kryesisht me gështenja, është shkrumbuar nga zjarri.
Flakët rrezikuan fillimisht banesat në zonë por ky rrezik është tejkaluar megjithatë vatra e zjarrit vijon të mbetet aktive dhe jashtë kontrollit.
Siç shihet nga videoja e ardhur në redaksinë Boldnews.al, flakët janë përhapur në një hapësirë me shkurre, çka bën të dyshohet se zjarrvënia mund të ketë qenë e qëllimshme.
Po gjatë ditës së sotme një zjarr i madh ka përfshirë shpatin e malit mbi fshatin Luzat në Tepelenë.
Raportohet se zjarri është i përmasave të mëdha dhe me gjithë praninë e forcave zjarrfikëse të qarkut të Gjirokastrës flakët janë jashtë kontrollit.
Situatë kritike gjatë ditës së sotme ka qenë edhe në malin e Tërnovës ku zjarri aktiv prej 10 ditësh ka dalë jashtë kontrollit duke djegur dhjetra hektar me bredha, pishë dhe pemë Ahu.
Kjo ka qenë zona më e paprekur në Bulqizë ndërsa me zjarrin e rënë, një nga perlat më të bukura të kurorës së liqenit të zi dëmtohet totalisht.
