Një delegacion nga Shqipëria, në përbërje të së cilit është guverantori Gent Sejko dhe zyrtarë të tjerë të lartë të Bankës së Shqipërisë dhe Ministrisë së Financave kanë marrë pjesë në Mbledhjet e Pranverës të Fondit Monetar Ndërkombëtar dhe të Grupit të Bankës Botërore në Uashington.
Gjatë takimeve me përfaqësues të lartë të dy institucioneve financiare ndërkombëtare, guverantori i ka njohur me ecurinë e ekonomisë shqiptare, e cila është në trend rritës, si dhe masat për të mbështetur këtë rritje nëpërmjet kombinimit të politikës monetare me atë fiskale.
Sejko ka shpjeguar edhe gjendjen e sektorit banklar, masat për nxitjen e kreditimit dhe uljen e kredive me probleme. Në fokus të bisedimeve ka qenë edhe nisma e deuroizimit, që synon sipas kreut të BSH-së, rritjen e përdorimit të monedhës kombëtare.
Duke vlerësuar këto nisma, zyrtarët e lartë ndërkombëtarë të FMN-së dhe Bankës Botërore theksuan se Shqipëria duhet të përfitojë nga trendi i rritjes ekonomike, stabiliteti financiar dhe sistemi i sigurt financiar, për të tërhequr investime të huaja, në mënyrë që kjo rritje ekonomike të jetë e shëndetshme në afat të gjatë.
Gjatë takimeve, përfaqësuesit e FMN-së dhe BB-së, përshëndetën rekomandimin pozitiv të dhënë nga Komisioni Evropian për çeljen e negociatave për anëtarësimin e Shqipërisë në Bashkimin Evropian. Ata u shprehën se për të përmirësuar ambientin e biznesit dhe për të ecur përpara në procesin e integrimit, mbetet i një rëndësie të veçantë vazhdimi i reformave strukturore në vend.
