Avionët luftarakë izraelitë thyen pengesën e zërit tre herë në më pak se 30 minuta mbi Bejrut të martën, duke shkaktuar zhurma të forta që i shtynë njerëzit në qytet të vrapojnë për t’u mbrojtur, pak përpara një fjalimi të planifikuar nga shefi i Hezbollahut, Hassan Nasrallah.
Avionët luftarakë izraelitë fluturuan ulët mbi kryeqytetin libanez, me dëshmitarët okularë që thonë se mund t’i shihnin avionët me sy të lirë.
Goditjet ishin më të fortat e dëgjuara në Bejrut në vite dhe ishte hera e tretë që izraelitët dërgonin avionët e tyre luftarakë në Bejrut gjatë javës së kaluar, duke shkelur hapësirën ajrore libaneze.
Shefi i Hezbollahut, Sayyid Hassan Nasrallah filloi fjalimin e tij rreth orës 17:00 (GMT) me rastin e përvjetorit njëjavor të vrasjes së komandantit të lartë ushtarak të grupit të armatosur libanez, Fouad Shukr, në një sulm izraelit në periferitë jugore të Bejrutit.
“Ajo që izraelitët po bëjnë me avionët në Bejrutin e Jugut është fëminore. Ata duan të na prishin ceremoninë sot dhe të trembin ata që marrin pjesë në të”, ka komentuar ndër të tjera Nasrallah.
Hezbollahu është zotuar se do t’i përgjigjet vrasjes, e cila ndodhi disa orë përpara asaj të liderit të Hamasit Ismail Haniya në Teheran, në një operacion që Izraeli nuk e ka konfirmuar apo mohuar zyrtarisht.
Dy vrasjet e kanë shtyrë rajonin e gjerë në prag të luftës, me të dyja palët që godasin në 24 orët e fundit, ndërsa Irani gjithashtu ka premtuar një përgjigje të dhimbshme për Tel Aviv.
