Në këtë vend të grabisin dhe meritat
Ka ndodhur dje në Lushnjë në familjen e Besnik Sharkës. Ministrja e Shëndetësisë dhe Çështjeve Sociale, Ogerta Manastirliu, shkoi në shtëpinë e re të sapondërtuar në një nga fshatrat e Lushnjës, duke bërë me këtë rast edhe reklamë për Edi Ramën, qeverinë dhe ndihmën e madhe që ajo po i jep shqiptarëve në nevojë. Madje, ministrja ka zëvendësuar Ramën në këtë vizitë.
Këtë e konfirmoi edhe zëdhënësja e saj. Por çfarë ka ndodhur në kët video të publikuar me pompozitet në ERTV, kanali personal i kryeministrit, ku pasqyrohen për shqiptarët të vërtetat e mëdha që nuk i transmetojnë mediat e kazanit. Emisioni Boom, prej gati tre muajsh, ndoqi dhe sensibilizoi opinionin për rastin e familjes Sharka, që jetonte në një gjendje të mjeruar. Menjëherë shqiptarët reaguan dhe u sensibilizuan, duke dhënë ndihmën e tyre edhe në ndërtimin e shtëpisë që vizitoi ministrja dje, e cila nuk ngurroi t’i bënte elozhe kryeministrit dhe bashkisë së Lushnjes. Ndoshta kush ua ka dhënë si rast, kryeministrit, apo ministres, duhet të ketë gënjyer pak edhe për ndihmën ekonomike që tashmë merr familja Sharka. Ka rreth dy muaj që kjo familje e përfiton ndihmën ekonomike kjo është bërë e mundur vetëm në sajë të këmbënguljes së emisionit Boom.
ERTV nuk ka bërë asgjë më shumë se sa ka vjedhur punën e tjetrit. Në këtë rast ështe vjedhur e puna së emisionit Boom dhe solidariteti i shqiptarëve. E gjitha kjo për të reklamuar qeverinë dhe asnjë punë të saj. Në të gjitha fjalët e saj, ministrja i fliste të zotit të shtëpisë dhe banorëve të tjerë për projektin “Shqipëria solidare”, për falënderime ndaj qeverisë dhe kryeministrit. Sic edhe kushdo e ka ndjekur, apo mund ta ndjekë, falënderimet e vërteta janë dhënë nga emisioni Boom, me emra konkretë dhe me kontribut konkret, ku hyn edhe financimi i shtëpisë, që s’ka lidhje fare me programet apo qeverisjes që thotë ministrja.
Boom, pasi ndoqi videon e postuar në ERTV me titullin “Një strehë e re për familjen e Besnik Sharkës falë bashkëpunimit me sipërmarrjen dhe ndihmë ekonomike përmes programit të Shqipërisë Solidare”, shkoi në shtëpinë e Besnikut, për të disatën herë, ta dëgjonim me veshët tanë nga goja e familjarëve, atë që dëgjuam nga goja e ministres. Dhe e vërteta, është e hidhur, por ndonjëherë çliruese edhe për ata me pushtet. Familjarët u shprehën se bashkia nuk i ka ndihmuar kurrë derisa doli problemi në emisionin Boom. Madje as nuk e kanë dëgjuar ndonjëherë Besnikun.
I vëllai I Besnikut u shpreh në kamerën tonë, se qeveria ka ditur çdo gjë, por as e ka vënë ujin në zjarr. Dhe për qershinë mbi tortë, ngjyrën e shtëpisë që ishte bërë pink, fillimisht e kishin lyer blu… Z. Kryeministër, detyra jonë është të jemi përcjellës të problemeve të njerëzve, të vemë në lëvizje institucionet dhe në fund të gjejmë një zgjidhje. Në rastin e Besnikut, pa modesti kemi bërë një mrekulli, së bashku me shqiptarët. Minimumi duhej të na falënderonit. Vjedhjen e punës, duke ia deleguar meritën qeverisjes dhe programeve tuaja, po ua falim.
