Situata në Shëngjin ka arritur pikën kritike, me zjarrin tek Rana e Hedhun që është ngjitur në objektet hotelerie dhe ka djegur 2 beach-bare në plazh.
Era e fortë dhe flakët përparojnë me shpejtësi. Policia ka urdhëruar evakuuim të plotë nga zona për banorët dhe të gjithë pushuesit.
Ndërkohë është krijuar kaos me pushuesit që largohen të alarmuar, sirenat e policisë dhe flakët që përparojnë drejt hoteleve.
Një pushues deklaron se ky është një “krim shtetëror”, pasi deklaron se zjarret janë të qëllimshme. Sipas tij, persona me interes të caktuar i kanë vendosur zjarrin për të djegur pishat dhe më pas të betonizohet e gjithë zona me ndërtime pa kriter.
“Janë grupet e interesit dhe grupe kriminale ndoshta të ardhur nga turizmi nga jugu. Sa shuhet një vatër merr zjarr një vatër tjetër. Policia duhet të gjejë ata që kanë marrë leje ndërtimi dhe pronarët e tokës ti arrestojë. Ata kanë interes se e duan pa pisha. Kjo është krim, janë duke dëmtuar mijëra pisha dhe rëna e hedhur ekzekutohet përfundimisht për të ngritur hotele. Është krim shtetëror dhe krim i organizuar”, tha një pushues.
