Seanca paraprake gjyqësore për dosjen e “Sterilizimit” është shtyrë për në datë 12 shtator, për shkak të mungesës së një avokati.
I pranishëm për herë të parë në sallën e gjyqit ishte ish-ministri i Shëndetësisë, Ilir Beqaj, i arrestuar për hetimet që po kryhen për vjedhjen e fondeve të BE-së kur ai ishte në krye të SASPAC.
Beqaj ka deklaruar para togave të zeza se “aktet e sjella në gjykim përmbajnë të pavërteta” dhe ka kërkuar të bënte një deklaratë për aktet procedurale që lidhen me hetimin tjetër.
Por gjykata e ndërpreu, pasi në këtë seancë nuk mund te kryhej me veprim për shkak të mungesës së mbrojtjes për një nga të pandehurit. Mungesa e pajustifikuar e një mbrojtësi, u bë shkak i pezullimit të afateve të paraburgimit për të gjithë të pandehurit. Kjo është hera e katërt që shtyhet seanca paraprake për çështjen “Sterizilimi”.
Më herët Prokuroria e Posaçme përfundoi hetimet për koncesionin 100 milionë euro të sterilizimit dhe u komunikoi akuzat personave që janë marrë të pandehur. Kjo ishte dosja e parë që shkoi në SPAK dhe pas tetë vitesh ajo u cilësua si një aferë korruptive.
