Roberta Metsola është rizgjedhur presidente e Parlamentit Europian për dy vitet e gjysmë të ardhshme, duke shënuar fillimin e legjislaturës së 10-të në Strasburg.
Në një votim të mbajtur mëngjesin e së martës, 45-vjeçarja kristiandemokrate nga Malta siguroi 562 vota pro nga 623 votat e hedhura nga ligjvënësit e sapozgjedhur, një fitore komode që tejkalon lehtësisht shumicën e nevojshme.
“Me mbështetjen tuaj, unë do të vazhdoj të punoj pa u lodhur për të bashkuar njerëzit. Kjo duhet të jetë një shtëpi që nuk mund të ketë frikë të udhëheqë dhe të ndryshojë,” tha Metsola në fjalimin e saj para votimit, duke premtuar se do të nxisë një atmosferë “debati” dhe “respekti”.
Irene Montero, sfiduesja simbolike e propozuar nga e majta, mori vetëm 61 vota.
Rezultati pasqyron profilin në rritje të Metsola-s si një udhëheqëse pragmatike e gatshme dhe e aftë për të punuar me forcat në të gjithë spektrin politik dhe çimenton kredencialet e saj si një nga figurat më të spikatura në Partinë Popullore Evropiane (EPP) të qendrës së djathtë.
Ajo u zgjodh për herë të parë në janar 2022, pas vdekjes së papritur të paraardhësit të saj, David Sassoli. Ngritja e saj ishte një moment suksesi për Maltën, e cila, si vendi më i vogël në BE, nuk kishte parë kurrë një qytetar të saj në një pozicion kaq të lartë.
Që atëherë, Metsola ka marrë një qasje aktive ndaj rolit të saj si presidente, duke udhëtuar nëpër kryeqytetet evropiane për të thelluar lidhjet personale me krerët e qeverive dhe për t’u shpjeguar qytetarëve rolin shpesh të keqkuptuar të Parlamentit.
