Atmosfera te skuadra e Partizanit nuk është aspak e qetë para ndeshjes së të hënës ndaj Skënderbeut.
Të kuqtë janë ndarë në fraksione dhge një gjë e tillë ka krijuar jo pak polemika mes lojtarëve titullarë, që pakënaqësitë e tyre nuk ngurojnë t’i shprehin edhe hapur në drejtim të njëri-tjetrit apo edhe trajnerit.
Dalipi nuk po e menaxhon siç duhet situatën në një kohë që vendi i tretë në klasifikim po vihet në rrezik dhe në rast se nuk fitohet ndaj Skënderbeut, “demat” mund të mbesin edhe pa një vend në Europë, çka do të thotë se sezoni i tyre do të jetë i dështuar.
Në stërvitjen e djeshme, ka pasur një episod shumë të pakëndshëm, ku janë përfshirë dy prej lojtarëve titullarë.
Edgar Çani ka nisur të debatojë ashpër me Jurgen Bardhin dhe mes tyre është futur edhe trajneri Dalipi i cili është munduar që të qetësojë situatën, por sulmuesi shtatlartë ka nisur të debatojë edhe më të.
Një sjellje e tillë ka krijuar një gjendje aspak pozitive te pjesa tjetër e ekipit, ndërsa Dalipi nuk ka marrë masa ndaj futbollistëve. Një gjë e tillë do të ndikonte për keq në një moment të tillë, te të kuqtë dhe gjithçka është munduar që të zgjidhet brenda familjes.
Kjo nuk është hera e parë që Çani debaton me trajnerin, pasi një gjë e tillë ka ndodhur edhe pak kohë më parë.
Prej ditësh te skuadra e Partizanit po flitet gjithmonë e më shumë për largime të një pjese të mirë titullarësh, ose më saktë lënie jashtë ekipit të pjesës më të madhe të tyre në takimin e radhës ndaj Skënderbeut.
Ky do të jetë edhe një sinjal se cilët nuk janë në planet e drejtuesve për sezonin e ri.
Një gjë e tillë ka krijuar një klimë jo shumë të mirë dhe ata që do të jenë në fushë në sfidën e radhës duhet të tregojnë vlerat e tyre për të bindur stafin teknik, pasi e ardhmja e tyre mund të varet pikërisht nga kjo ndeshje.
