Detaje të reja mësohen lidhur me sekuestrimin e një sasi prej më shumë se 400 kg marijuhanë një ditë më parë në Thumanë të Krujës.
Burime pranë grupit hetimor thanë për “SYRI.net” se ka filmime të automjeteve ku u gjet narkotike. Mjetet shfaqen në parkingun e një biznesi të njohur në zonë. Në pamje, dallohet edhe efektivi i policisë me iniciale S.O., me shërbim në Tiranë. Policia njoftoi se ka shpallur në kërkim punonjësin e policisë, pozicioni i të cilit në raport me ngjarjen, pritet të sqarohet nga hetimet e mëtejshme. Droga e sekuestruar dyshohet se i përket një grupi të fuqishëm kriminal.
Aksionet për sekuestrimin e drogës një ditë më parë dhe arrestimin e ish-doganierit të pikës kufitare të Kakavijës Benard Hamzai, 40 vjeç nga Gjirokastra, janë bërë pa prezencën e një prokurori.
Zyrtarisht Drejtoria Vendore e Policisë së Durrësit, njoftoi se: “Të enjte, në fshatin Thumanë, nga kontrolli i ushtruar në dy automjete u gjetën dhe sekuestruan në cilësinë e provës materiale 421 kg e 450 gr lëndë narkotike e dyshuar e llojit Marijuanë. Nga hetimet e kryera dyshohet se shtetasi S.O. është i përfshirë në këtë aktivitet kriminal. Nga ana jonë është njoftuar Drejtoria e Përgjithshme e Standarteve Profesionale në Policinë e Shtetit, e cila ka bërë pezullimin e menjëhershëm nga detyra dhe nisjen e ecurisë disiplinore për shkelje të rëndë”.
Policia e Durrësit, ndaj efektivit në kërkim S.O. ka ngritur akuzën “Krijimi i lehtësirave për marrjen dhe përdorimin e drogës”, parashikuar nga Neni 283/2 i Kodit Penal.
