Është regjistruar barazimi i parë në këtë edicion të kampionatit europian në ndeshjen e gjashtë të “Gjermani Euro 2024”.
Bëhej fjalë për ndeshjen mes Sllovenisë dhe Danimarkës të luajtur në Stuttgart që u mbyll me rezultatin 1-1, e vlefshme për grupin C.
Ishin danezët ata që realizuan të parët, që në fraksionin e parë të lojë, me Cristian Eriksen në minutën e ’17 të takimit.
Mesfushori rikthehet me gol në kampionatin europian, pas 1100 ditësh nga takimi me Finlandën ne Euro2020, kur luftoi me jetën pas atakut ne zemër gjatë asaj sfide, duke panikosur në atë kohë gjithë globin. Cristian Eriksen ia doli, luan sërish në një kampionat europian dhe madje shënon dhe një gol të veçantë.
Në pjesën e dytë të lojës, sllovenët ndryshuan kurs dhe ritëm duke dominuar takimin dhe provuan shumë që të gjenin baraspeshën. “Ylli” i tyre Benjamin Šeško, goditi edhe shtyllën në minutën e 75-të të takimit, pak para se të barazonin reultatin.
Në minutën e 77-tën, sllovenët barazuan me Janza, i cili edhe pak me ndihmën e fatit arriti të mposht “murin” Shmajkëll. Janza gjuan një “predhë” nga jashtë zone, ku topi devijohet nga mbrojtja daneze duke i ndryshuar trajektoren dhe më pas përfundon në rrjetë.
Një gol që vendosi në lëvizje të dyja skuadrat, por rezultati nuk ndryshoj deri në fund, pavarësisht dëshirës më të theksuar nga sllovenët.
Sllovenia do të përballet me Serbinë në ndeshjen e radhës me datë 20 qershor, ndërsa Danimarka e ka me Anglinë në po atë datë.
