Në Forumin Qytetar për Sigurinë që u zhvillua në Dibër, deputeti demokrat Xhemal Gjunkshi, ngriti akuzën se në këtë zonë ka ndërtesa të mbushura me drogë. Por Ministri i Brendshëm Xhafaj i pranishëm në aktivitet, tha se për çështjet e sigurisë nuk duhet të ketë dallime politike, ndërsa kryepolici Veliu shtoi se Dibra kishte shifrat më të ulëta të kanabisit vitin e kaluar. Në takim foli edhe ambasadori britanik.
Ministri i Brendshëm, Fatmir Xhafaj dhe deputeti demokrat Xhemal Gjunkshi, debatuan në Forumin Qytetar për Sigurinë në Dibër, në lidhje me akuzat se në këtë zonë ka ndërtesa të mbushura me drogë. akuza u bë nga deputeti i PD, i pranishëm në takim.
“Këtu në Dibër droga u mbull, u magazinu, u transportu dhe u shit dhe prap sot ka ndërtesa që janë të mbushura me lëndë narkotike”,- tha Gjunkshi.
Ndërsa kryepolici, Ardi Veliu pretendoi të kundërtën, duke shtuar madje se Dibra është zona ku në 2 vitet e fundit ka pasur më pak ngjarje kriminale.
“Policia e Dibrës ka pasur shifrat më të ulëta të kanabisit në 2017. Unë nuk mund ta mohoj që policia e qarkut DIbër, dy vitet e fundit nuk ka pasur asnjë ngjarje të rëndë”,- u përgjigj Veliu.
Ministri i Brendshëm, Fatmir Xhafaj tha se në çeshtjet e sigurisë nuk duhet të ketë dallime politike kur është fjala për luftën ndaj krimit.
“Ne jemi kundërshtarë, por ne nuk jemi armiq, çështjet e sigurisë, të rendit publik janë çështje që nuk mund dhe nuk duhet ti ndajnë partitë politike”,- tha Ministri i Brendshëm, Fatmir Xhafaj.
Ndërkaq, Xhafaj pranoi edhe mënyrën sesi e shohin qytetarët bashkëpunimin me policinë.
“Ne e kemi pak problem kur duhet ti themi policisë që ka ndodhur ky krim dhe dyshoj për X apo Y se tek ne të quajnë spiunë”,- shtoi Xhafaj.
Në takim ishte i pranishëm edhe ambasadori britanik në Tiranë, Dankan Norman, i cili u shpreh se e mbështet këtë nismë të Ministrisë së Brendshme, ndërsa shtoi se komuniteti shqiptar atje është vetëm një pjesë e vogël e problematikës me kriminalitetin.
