Vendimin e Komisionit Evropian për të rekomanduar hapjen e negociatave për Shqipërinë, Kryeministri Edi Rama e ka cilësuar si marrjen e një dëftese për punën që është bërë. Në krah të shefes së politikës së jashtme në BE, Rama tha se ka disa njerëz në union që duan të nxjerrin bishta sa i përket rrugës europiane të vendit.
“Ka individë apo forca të tilla që duan të na përdorin si top për lojëra të brendshme politike andej këtej”, tha shefi i qeverisë shqiptare.
Kjo deklaratë e Ramës vjen pasi Gjermania dhe Franca janë shprehur skeptike në lidhje me zgjerimin e BE-së drejt Ballkanit Perëndimor. Akoma dhe më tej që pas vendimit të KE-së, duhet votim unanim i vendeve të unionin për të dhënë përfundimisht dritën jeshile për hapjen e negociatave. Një ditë më parë presidenti Francez tha se nuk është kjo koha që BE të zgjerohet me Ballkanin Perëndimor.
