Eksportet kanë shënuar rritje në muajt e parë të këtij viti, pavarësisht rënies së fortë të euros, monedhë në të cilën realizohet i gjithë ky aktivitet dhe që ka penalizuar shumë këtë degë të ekonomisë.
Të dhënat e fundit të Institutit të Statistikave tregojnë se gjatë tremujorit të parë të këtij viti, eksportet e mallrave arritën vlerën 74 miliardë lekë, duke u rritur me 18.9 % krahasuar me një vit më parë.
Në rritje janë edhe importet, ndonëse me ritme më të ngadalta. Sipas INSTAT-it, gjatë tremujorit të parë të 2018-ës, importet e mallrave arritën vlerën 146 miliardë lekë, duke u rritur me 9.6 % kundrejt të njëjtës periudhë të një viti më parë.
Deficiti tregtar në këtë periudhë arriti vlerën 71 miliardë lekë, duke u rritur me 1.4 %, krahasuar me të nëjtën periudhë të një viti më parë.
Nga erdhi rritja e eksporteve
Instituti i Statistikave vlerëson se në tremujorin e parë të këtij viti rritja e eksporteve është ndikuar kryesisht nga grupi “Materiale ndërtimi dhe metale”, që ka shënuar rritje
+ 5.6 për qind. Me ecuri pozitive është edhe grupi “Tekstile dhe këpucë”, që është rritur me +5.2 për qind, si dhe “Minerale, lëndë djegëse, energji elektrike” me +2.7 për qind.
Të dhënat tregojnë se nuk ka ndryshime në strukturën e eksporteve, të cilat vijojnë të jenë të varura nga dy industri të caktuara, si mineralet dhe fasonët.
Nga erdhi rritja e importeve
INSTAT vlerëson se grupet që kanë ndikuar pozitivisht në rritjen vjetore të importeve, janë: “Makineri, pajisje, pjesë këmbimi” me +3.3 për qind, “Minerale, lëndë djegëse, energji elektrike” me +2.5 për qind, “Tekstile dhe këpucë” me +1.1 për qind. Në ndryshimin vjetor të importeve ka ndikuar negativisht grupi: “Produkte kimike dhe plastike” me -0.7 për qind.
Rritja e importit të makinerive dhe pajisjeve është një lajm i mirë për ekonominë, pasi tregon për rinovim të teknologjisë nga biznesi dhe shtim të prodhimit.
