Forcat e Posaçme Operacionale të Policisë së Shtetit kanë arrestuar një të ri në Lezhë, i cili ishte i shpallur në kërkim ndërkombëtar nga autoritetet spanjolle për trafik të lëndëve narkotike
Në kuadër të operacionit policor të koduar “Operacionalja 8” është vënë në pranga shtetasi Kristo Biba, 28 vjeç, i lindur në fshatin Domgjon, Lezhë. Raportohet se ai është kapur në Shënkoll.
I akuzuar nga autoritetet spanjolle, për trafikim të lëndëve narkotike, kapet në Lezhë dhe arrestohet me qëllim ekstradimin në Spanjë, 28-vjeçari.
“Gjykata e Tarragonës, Spanjë, me vendimin e datës 28.05.2024, i ka caktuar këtij shtetasi, masën e sigurisë “Arrest në burg”, për veprën penale “Trafikimi i lëndëve narkotike”, parashikuar nga Kodi Penal i Spanjës.” – thuhet në njoftimin e Policisë.
Raportohet se Interpol Tirana dhe Interpol Madrid po bashkëpunojnë për të kryer ekstradimin e 28-vjeçarit drejt Spanjës.
