Ish-deputeti demokrat dhe anëtari i Kryesisë së Selisë Blu, Gent Strazimiri, shprehet se edhe vota kundër e opozitës ndaj rezolutës së socialistëve për anti-korrupsionin do të ishte një farsë, pasi sipas tij, fjalimet në Kuvend të kolegeve të tij ishin ezauruese për sa i përket të gjithë farsës së kryeministrit për këtë çështje.
“Ju e kuptoni që kjo qeveri dhe ky kryeministër ka sjellë në rend të ditës tashmë çështje që Shqipëria nuk i ka pasur kurrë më parë, që nga kriminalizimi direkt i Kuvendit dhe Qeverisë, pushteti vendor është i gjithi në duart e krimit të organizuar, ku edhe sot arrestohen drejtorë të rëndësishëm në bashkitë e vendit për implikimin e tyre në krime dhe vjedhje shtëpishë, dhe ta mbulosh sot me një rezolutë është e tepërt.
Dhe siç te thoshte politikani i madh italian, Xhulio Andreoti se nëse dëshiron të mos zgjidhësh asnjë problem, krijo një komision. Dhe ky komision angazhohet në fakt të zgjidhë probleme që duhet t’i zgjidhë ligji. Dhe komisioni do të jetë i drejtuar pikërisht nga ai që e ka krijuar problemin.
Nga momenti që propozohet, drejtohet dhe dëshirohet nga Edi Rama, që është njeriu dhe formuesi i bandave në këtë vend gjithçka është e mundur sa i përket dublimit të punëve të SPAK-ut. Dhe këtë e bën për të futur në burg të sakrifikueshmit, jo fajtorët, jo kokën apo thelbin e problemit, në mënyrë që ai të vazhdojë të qëndrojë në pushtet i qetë dhe historia të vazhdojë të përsëritet.
Kjo drejtësi jep shpresë për opozitën sa ç’jepte shpresë Osman Kazazi në vitin 1982, apo drejtësia që jepte Aranit Çela sepse drejtësia që kishte vendosur Enver Hoxha ishte ajo drejtësia ndaj Mehmet Shehut dhe Kadri Hazbiut. Është edhe ky një film që e kemi parë.
Fakti që opozita refuzon ta quajë drejtësi këtë palaçollëk është shpresë për këtë vend. Dhe për këtë arsye nuk po sillemi si politikanë, por si misionarë”, tha Strazimiri.
Lidhur me hetmin ndaj kryebashkiakut të Tiranës Erion Veliaj dhe drejtorëve të tij që kanë detyruar të dalë në protesta të përjavshme para Bashkisë, Strazimiri u shpreh se protesta është rruga e duhur dhe e vetmja për të rrëzuar këtë qeveri dhe bashki të korruptuar.
Ai shton se shqiptarët duhet të ngrihen në këmbë t’i thonë ‘Jo’ gjithë këtij perversiteti.
“Ka pasur një numër të shtuar policësh në proporcion të zhdrejtë me protestuesit, dhe kjo tregon frikën e këtij regjimi.
Sot duhej të ishte bërë nami, pasi është një shoqëri e lodhur, e sfilitur nga kjo situatë.
SPAK nuk po bën asgjë për këto çështje, dhe nuk po bën drejtësi. Nëse historia e integrimit evropian do ishte e vërtetë, atëherë vetë BE-ja nuk do ta pranonte këtë çështjen e emihgrantëve. Po bëhet këtu një depozitë shumë e madhe refugjatësh, dhe nëse e pranojmë një gjë të tillë e kemi pranuar se nuk duam që të bëhemi kurrë anëtarë të BE-së.
Shqiptarët duhet të ngrihen vetë në këmbë dhe t’i thonë “jo” gjithë këtij perversiteti”, theksoi ndër të tjera ish-deputeti demokrat Gent Strazimiri, në një intervistë për “Ora News”.
