Është zbuluar identiteti i auroti që qëlloi me armë zjarri kryeministrin e Sllovakisë, Robert Fico, pasditen e kësaj të marte, duke e lënë të plagosur në gjendje kritike.
Mediat sllovake raportojnë se autori është shkrimtari 71-vjeçar sllovak i quajtur Juraj Tsintula, i cili ka tentuar të vrasë kryeministrin e vendit të tij, duke e qëlluar 4 herë me armë zjarri.
Sipas raportimeve, Tsintula ka bërtitur në drejtim të Fico-s teksa ky i fundit po fliste me mbështetësit e tij dhe kur i është afruar për t’i dhënë dorën, ka hapur zjarr.
71-vjeçari është një nga themeluesit e klubit letrar DÚHA, i hapur në vitin 2005. Deri në vitin 2016 ka qenë president i klubit dhe ka shkruar tre përmbledhje me poezi. Që nga viti 2015 është anëtar i Shoqatës së Shkrimtarëve sllovakë. Sipas informacioneve, në vitin 2016 ai punonte si shofer në një qendër tregtare në Levice, qytetin që është vendlindja e tij.
Tsintula thuhet se kishte në pronësi të ligjshme armën të cilën e përdori për të shtënë në drejtim të kryeministrit sllovak. Ai u arrestua menjëherë pas incidentit të përgjakshëm.
Për median lokale Aktuality.sk ka folur djali i shkrimtarit, i cili ka thënë se është tronditur nga kjo situatë, ndërsa konfirmoi se babai i tij kishte leje për armë.
“Unë nuk kam absolutisht asnjë ide se çfarë po bënte babai im, çfarë po planifikonte dhe pse ndodhi e gjithë kjo. Ai është i fortë, por nuk kishte qenë ndonjëherë në një psikiatër apo diçka e tillë”, tha ai.
Kur u pyet nëse i ati ka shprehur më parë ndjenja urrejtje ndaj kryeministrit Fico, ai u përgjigj: “Unë do t’ju them kaq, ai nuk e votoi atë. Kaq mund të them”.
Ngjarja ndodhi përpara një qendre të komunitetit kulturor në qytetin Handlova, ku ishte mbajtur një mbledhje e qeverisë. Handlova është rreth 180 km (112 milje) në veri-lindje të kryeqytetit Bratislavë.
Fico është dërguar me urgjencë në spital, ku pritet ti nënshtrohet një operacioni kritik për jetën e tij.
Ai është plagosur nga katër plumba, tre prej të cilëve në pjesën e barkut, krahut dhe në këmbë. Gjendja e tij është kritike.
