Komisioni Evropian do të rekomandojë që Bashkimi Evropian të fillojë negociatat e pranimit me Shqipërinë dhe Maqedoninë, sipas një draft dokumenti.
Dokumenti është pjesë e paketës vjetore të zgjerimit të BE-së, do të publikohet më 17 prill në Strasburg dhe përshkruan se sa larg janë vendet e Ballkanit Perëndimor dhe Turqia, në rrugën e tyre drejt anëtarësimit në Bashkimin Evropian.
Komisioni Europian ka rekomanduar fillimin e negociatave me Maqedoninë çdo vit që nga viti 2009, por vendet anëtare të BE në Këshill, veçanërisht Greqia, i kanë bllokuar gjithmonë bisedimet për shkak të çështjes së emrit.
Negociatat ndërmjet dy vendeve kanë rritur ritmin këtë vit, duke nxitur shpresat për të gjetur një kompromis që do të zhbllokojë rrugën e Shkupit për anëtarësimin në BE dhe NATO. Shkupi i ka mbijetuar gjithashtu në një luftë të ashpër politike që kulmoi në prill 2017, kur disa qindra protestues sulmuan Parlamentin dhe rrahën disa ligjvënës, duke përfshirë kryeministrin aktual Zoran Zaev.
Me tensionet që janë ulur që atëherë, Komisioni vë në dukje se Maqedonia “ka tejkaluar krizën e saj të thellë politike” dhe thekson se “vullneti politik për të ecur përpara është qartë i pranishëm“, duke shtuar se “një ndryshim pozitiv në mendjen politike është parë në të gjithë shoqërinë, mungesa e të cilave ka qenë një pengesë e madhe për reformat në vitet e fundit“.
Në të njëjtën kohë, shton se “reformat e nevojshme strukturore janë një proces i gjatë që do të duhen vite dhe dëmi i viteve të fundit nuk mund të zhbëhet brenda natës“.
Dokumenti gjithashtu konfirmon se Komisioni Europian, për herë të parë, rekomandon hapjen e negociatave të pranimit në BE me Shqipërinë, e cila u bë një vend kandidat zyrtar i BE në vitin 2014.
Dokumenti thekson se “reforma e administratës publike ka qenë e konsoliduar, me qëllim të rritjes së profesionalizmit dhe depolitizimit të saj“.
KE gjithashtu shton se “janë ndërmarrë veprime të mëtejshme për të përforcuar pavarësinë, efikasitetin dhe llogaridhënien e institucioneve gjyqësore, veçanërisht nëpërmjet avancimit në zbatimin e një reforme gjithëpërfshirëse të drejtësisë“.
Komisioni Evropian, megjithatë, paralajmëron se “rezultatet e vazhdueshme, konkrete dhe të prekshme në rivlerësimin e gjyqtarëve dhe prokurorëve do të jenë vendimtare për përparimin e mëtejshëm të Shqipërisë“.
