Partia Konservatore e Mbretërisë së Bashkuar ka shprehur shqetësimin drejtuar qeverisë shqiptare, e cila, sipas saj, ka treguar se nuk po bën asgjë për të luftuar krimin e organizuar dhe korrupsionin.
Këtë qëndrim e bëri të ditur deputetja demokrate Fatbardha Kadiu, e cila mori pjesë në aktivitetin e organizuar nga partia e Tereza May në Londër, me temë “Mbi gjithëpërfshirjen dhe ndërtimin e një qeverie, e një shteti që punon për të gjithë”.
Deputetja e PD-së tha se në të gjitha bashkëbisedimet që ka zhvilluar me përfaqësues të kësaj partie, shqetësimi kryesor ka qenë pikërisht mungesa e angazhimit serioz të qeverisë për të luftuar krimin, lidhjet e saj me eksponentë kriminalë si dhe kanabizimin e vendit.
Ndërkohë, ajo shtoi se pavarësisht qëndrimit të partisë konservatore, “sigurisht që shpreha gatishmërinë tonë për të luftuar krimin, korrupsionin dhe për të bashkëpunuar ngushtë me Partinë Konservatore të kryeministres May si dhe me ambasadorin e Mbretërisë së Bashkuar”.
