Donika Jonuzi, që akuzohet se organizoi vrasjen e burrit të saj Ilir Osmani, ka folur për emisionin Uniko në Klan Plus dhe ka treguar variantin e saj të ngjarjes.
Ajo është etiketuar “lypësja e pasur” nga Elbasani që lyp në Pejë, për shkak se në disa foto të Donikës kjo e fundit shihet e veshur me rroba të mira, varëse floriri madje ka në zotërim edhe një makinë Mercedes-Benz.
Por varianti tjetër i saj është lypja në rrugët e Pejës. Çfarë thotë Donika Jonuzi për këto dy variante të saj?
Donika Jonuzi: Aty që jam me kostumin e kuq kam qenë në dasmë, motra ime martoi djalin.
Spartak Koka: Ne kemi bërë këtë lloj krahasimi, thamë “lypësja e pasur”. Nga njëra anë me varëset e floririt dhe nga ana tjetër reflektoni një gjendje e cila ishte katastrofë.
Donika Jonuzi: Shumë e drejtë.
Spartak Koka: Si ka mundësi?
Donika Jonuzi: Më ka çuar Iliri.
Spartak Koka: Pra, ju nuk keni sot më mundësi familjare?
Donika Jonuzi: Nuk kam, m’i ka ngrënë Iliri, të gjithë pasurinë.
Spartak Koka: Konkretisht?
Donika Jonuzi: Makinën e kuqe që ke parë në foto, që është Iliri bashkë me Serxhon.
Spartak Koka: Makina juaj me targa të huaja?
Donika Jonuzi: E vërtetë, është makina ime, e kam blerë në Durrës. Kam qenë e martuar me francezin.
Spartak Koka: Po francezi jeton sot apo ka ndërruar jetë?
Donika Jonuzi: Jo ka ndërruar jetë.
Spartak Koka: Ke marrë pasuri ti nga francezi?
Donika Jonuzi: Kam marrë lekët që më ka dhënë, shpërblimi i burrit domethënë.
Spartak Koka: Francezin e ke njohur për letra? Je martuar me dashuri?
Donika Jonuzi: Jo, punë letrash.
Spartak Koka: Po pse të ka dhënë shpërblim?
Donika Jonuzi: Po kam jetuar afërsisht 2-3 vjet me atë. Francezi ka qenë 70 e ca vjeç kur jemi lidhur për herë të parë.
Kujtojmë se bashkëjetuesi i saj Ilir Osmani, një qytetar nga Elbasani, humbi jetën në Pejë të Kosovës, pasi u përplas për vdekje nga një automjet. Ngjarja që fillimisht u dyshua si aksidentale, rezulton se ishte vrasje e qëllimshme. Shoferi i makinës që e përplasi për vdekje është Serxhio Jonuzi 23 vjeç nga Elbasani, nipi i Donika Jonuzit.
