Antoine Griezmann ka qenë vazhdimisht i lidhur me një lëvizje në Barcelonë për sezonin e ardhshëm, por zëdhënësi i Atlético Madrid, Clemente Villaverde këmbëngul, se asnjë klub nuk ka kërkuar informacion për sulmuesin e Francës.
Barça thuhet se do të nënshkruajë me një sulmues tjetër të klasit botëror në fund të sezonit 2017-2018, pasi ata duan të forcojnë skuadrën e tyre pas largimit të Neymar në Paris Saint-Germain gushtin e kaluar për shifrën rekord 222 milionë euro.
Philippe Coutinho dhe Ousmane Dembélé janë afruar në “Camp Nou” për të forcuar katalanasit dhe në të njëjtën kohë për të zëvendësuar yllin brazilian, ndonëse asnjëri prej tyre ende nuk ka patur një ndikim të madh.
Madje Dembélé deri tani konsiderohet si dështim, pasi për asnjë moment nuk ka treguar asgjë nga repertori i tij.
Raportet tregojnë se drejtuesit e Barcelonës dhe Griezmann kanë nisur kontaktet për një transferim në verë, pasi Atlético po përgatitet të shtrëngojë dhëmbët për klauzolën e lirimit të lojtarit duke rënë nga 200 milionë euro në 100 milionë euro më 1 korrik.
Megjithatë, drejtuesit e Atlético janë të bindur se nuk kanë patur diskutime me asnjë klub për yllin francez, që ka pranuar, se do t’i pëlqente të luante për një klub të madh. Villaverde i tha “Mundo Deportivo”:
“Për momentin mund të them se ai është një lojtar i Atlético Madrid dhe unë vetëm mund të flas për fakte dhe realitetin, jo për të ardhmen. Ai ka një kontratë me ne. Askush nuk e ka kërkuar atë. Griezmann është një lojtar i Atlético dhe unë nuk di asgjë për Barçën”.
Griezmann ka grumbulluar 27 ndeshje për Atlético Madrid këtë sezon në La Liga duke shënuar 18 gola. Pasi e nisi keq sezonin, duket se francezi është rikthyer në formën e tij më të mirë duke qenë përcaktues për klubin në momentin më vendimtar të sezonit.