Ka përfunduar seanca në GJKKO për ish ministrin e Mbrojtjes, Fatmir Mediu, i cili është vënë nën hetim për tragjedinë e Gërdecit.
Mësohet se Prokuroria ka marrë në pyetje dëshmitarët, përveç Anjola Agollit, për të cilën kërkoi kohë për shkak se nuk gjendet në Shqipëri dhe vijoi me leximin e provave shkresore.
Seanca e radhës u caktua më 24 prill, ora 12:00.
Sakaq në një deklaratë për mediat pas daljes nga seanca, Mediu u shpreh se po tentohet të mbyllet procesi me shpejtësi, por pa treguar se cilat ishin përgjegjësitë e tij.
“Ashtu siç u kërkua thirrja e dëshmitarëve, prokuroria ka sjellë një volum shkresash pa përcaktuar asgjë. Por pa përcaktuar dhe përgjegjësitë e ministrit. U tha se ishte salduar një karrocë. I kërkuam prokurorisë që të na thotë se ku është përgjegjësia e ministrit në kuadër të shpërdorimit të
detyrës. Nëse nuk hyhet në thelb të së vërtetës, mendoj se është një proces që të kalohet te procesi i radhës. Sikur duan që të mbarojë seanca shpejt. Se çfarë ka ndodhur në Gërdec, njerëzit e dinë, se çfarë ka bërë ministri, atë duhet të faktojnë. Unë duhet të analizoj ekspertizën e amerikanëve. Ata kanë lënë 5 shkaqe në fuqi. Nuk u bë herën e parë, ndaj mendoj se duhen marrë në konsideratë të gjitha gjërat. Nuk merret ministri me çështjet e kalibrave. Shefi i Shtabit të Përgjithshëm duhet të japë versionin e tij. Nuk është e vështirë që të gjendet adresa e tij në SHBA.”, tha ai.
Ish-ministri, Mediu po hetohet për çështjen ‘Gërdeci’, tragjedia që ndodhi në 15 mars të 2008-ës, ku nga shpërthimi i punishtes së demontimit të armëve mbetën 26 të vrarë dhe qindra të plagosur. Mediu po gjykohet për dy akuza, atë të “Shpërdorimit të Detyrës” dhe “Shpërdorim i detyrës në bashkëpunim me subjekt ushtarak-kuadër komandues”.
Ish-ministri ka mohuar akuzat ndaj tij, duke u shprehur se gjatë detyrës ka zbatuar gjithnjë ligjin.
