Ka ndërruar jetë gazetari i njohur i kronikës së zezë, Zamir Dule. Ai ka mbyllur sytë përgjithmonë në moshën 55-vjeçare ditën e djeshme në një spital privat në Tiranë.
Sot ai do të përcillet për në banesën e fundit, ku do të prehet në vendlindje, në fshatin Miras të Devollit. Lajmin e hidhur për ndarjen nga jeta të gazetariot e kanë bërë me dije familjarët e tij.
Prej fillimit të muajit Mars, ai ishte shtruar në një spital privat në Tiranë, pasi vuante nga problemet me zemrën. Pak ditë më parë, Unioni i Gazetarëve përcolli apelin për ndihmë të familjarëve të tij, ku Dule do të duhej t’i nënshtrohej një ndërhyrje kirurgjikale, por që kishte një kosto të lartë të papërballueshme nga familjarët.
Zamir Dule, ka kontribuar jo pak gjatë viteve të tij të punës. Ai nisi punën si gazetar në gazetën “Zëri i Rinisë” dhe më pas filloi korrespondent i gazetës “Koha Jonë” për Qarkun e Korçës. Në vitin 1994, ai erdhi në Tiranë ku mbuloi po sektorin e kronikës për policinë, prokurorinë dhe gjykatën. Ai arriti kulmin në karrierën e tij në vitin 1996, kur shkroi edhe librin “Përbindëshi i Tropojës”.
Zamir Dule u tërhoq nga profesioni në vitit 1997, pasi u dhunua nga policia e asaj kohe në redaksinë e gazetës “Koha Jonë”. Ai u shoqërua në polici ku u torturua e për pasojë pati edhe probleme të shëndetit mendor.
Qeveria e kryeministrit socialist Fatos Nano i akordoi gazetarit Zamir Dule pension special, në shenjë vlerësimi për punën në kushte të përndjekjes dhe sidomos për torturimin e tij nga struktura policore.
Pas largimit nga gazetaria Dule u zhvendos në Korçë, ku jetonte me vëllain në vendlindjen e tij, fshatin Miras të Devollit.
