Avokatët e ish-futbollistit brazilian, Robson de Souza “Robinho” paraqitën këtë të enjte një kërkesë për “habeas corpus” përpara Gjykatës së Lartë për të shmangur burgimin e tij të menjëhershëm, të urdhëruar një ditë më parë nga një gjykatë tjetër në mënyrë që ai të vuajë dënimin për përdhunimin e një shqiptareje, kur luante me Milanin, në Brazil (është dënuar me 9 vite burg nga gjykatat italiane).
Kërkesa pohon se vendimi i Gjykatës së Lartë të Drejtësisë së Brazilit për miratimin e dënimit me nëntë vjet burg të dhënë nga gjykatat italiane bie ndesh me kushtetutën e vendit të Amerikës së Jugut, e cila ndalon ekstradimin e shtetasve të tij.
Gjykata, e cila është një hap poshtë Gjykatës së Lartë, vendosi të mërkurën me nëntë vota pro dhe dy kundër që Robinho të vuante dënimin në një burg brazilian menjëherë dhe në një regjim të mbyllur.
“Habeas corpus”, që tani dëshiron të përdorë mbrojtja, është një mekanizëm i parashikuar nga kushtetuta braziliane për këdo që ndihet i kërcënuar nga një urdhër burgu që e konsideron të paligjshëm ose si rezultat i abuzimit me pushtetin.
Gjatë seancës së të mërkurës, avokati i ish-futbollistit të Real Madridit vuri në dukje shkeljet e supozuara të procesit të rregullt ligjor në Itali dhe deklaroi se ligji brazilian, që lejon homologimin e dënimeve të huaja, vjen pas krimit të kryer, argumente që u hodhën poshtë nga gjyqtari hetues, Francisco Falcao.
Magjistrati shpjegoi në votën e tij se nuk i takon drejtësisë braziliane të rishikojë dënimin e dhënë tashmë nga një gjykatë italiane ose të hapë një gjyq të ri, por vetëm të shqyrtojë nëse plotësohen të gjitha kërkesat për të pranuar kërkesën e Italisë për vuajtjen e dënimit në Brazil.
Robinho, 40 vjeç, u dënua për pjesëmarrjen e tij në përdhunimin në grup të një të reje shqiptare në një klub nate në Milano në vitin 2013, por ai nuk e kreu kurrë dënimin, sepse u kthye në Brazil.
