Guvernatori i Bankës së Shqipërisë, Gent Sejko ka raportuar në komisionin parlamentar të ekonomisë për gjendjen e ekonomisë, sistemit bankar në vend dhe institucionin që drejton gjatë vitit 2017.
Ai ka shpjeguar edhe rënien e euros në tregun valutor shqiptar, një dukuri që ka ngjallur jo pak diskutime, vecanërisht pas nismës së deuroizimit të nisur nga BSH.
Për guvernatorin Sejko faktorët e brendshëm janë ata që kanë ndikuar në dobësimin e monedhës europiane dhe forcimin e lekut.
“Forcimi i lekut gjatë dy viteve të fundit ka qenë në vëmendjen e Bankës së Shqipërisë, si pasojë e ndikimit të gjithanshëm që ka ky faktor mbi treguesit e përgjithshëm ekonomikë e financiarë, përfshi dhe inflacionin.
Analizat tona tregojnë se tendenca mbiçmuese e kursit të këmbimit pasqyron përmirësimin e faktorëve fondamentalë, të tillë si ngushtimi i deficitit tregtar dhe i atij të llogarisë korrente, nivelet e larta të prurjeve valutore në formën e investimeve të huaja direkte, si dhe rritja e besimit ndaj monedhës kombëtare në tregun e brendshëm financiar. Për sa kohë ky mbiçmim përfaqëson efektin e faktorëve të qëndrueshëm ekonomikë e financiarë, ai nuk sjell pasoja të dëmshme për ekonominë shqiptare”, ka deklaruar Sejko.
Sipas kreut të Bankës së Shqipërisë, efektet e forcimit të lekut shfaqen në formën e presioneve të reduktuara inflacioniste në tregun e brendshëm shqiptar.
Forcimi i lekut vlerësohet të ketë reduktuar inflacionin e vitit 2017 me 0.2-0.3 për qind.
Duke komentuar ekonominë, në kontekstin e shfrytëzimit ende jo të plotë të kapaciteteve prodhuese dhe të presioneve të dobëta inflacioniste, guvernatori shpjegoi se Banka e Shqipërisë ruajti të pandryshuar kahun dhe intensitetin e stimulit monetar gjatë vitit 2017.
Norma bazë e interesit ruajti nivelin e ulët historik prej 1.25%, duke krijuar premisa për uljen e kostove të financimit të sektorit real.
