Një i ri është arrestuar nga policia e Durrësit pasi i ka gjetur në automjet një shumë monetare për të cilën blutë dyshojnë se është përfituar nga aktivitete të jashtëligjshme.
Në pranga u vu 30-vjeçari Denis Trebeshina.
Burime zyrtare nga policia bënë me dije se aksioni erdhi “bazuar në informacionet e siguruara nga inteligjenca policore se një shtetas posedonte një shumë të madhe parash”.
“Në lagjen nr.17, gjatë kontrollit në automjetin me drejtues shtetasin D.T., shërbimet e Policisë gjetën 116 685 euro, të cilat u sekuestruan në cilësinë e provës materiale. Në vijim të veprimeve për këtë rast u arrestua shtetasi D.T., 30 vjeç, banues në lagjen nr.2, Durrës”, njoftoi policia.
Vijojnë veprimet hetimore për të vërtetuar burimin e të ardhurave të këtij shtetasi, shtuan të njëjtat burime, ndërsa materialet procedurale i kaluan prokurorisë së rrethit.
