Ministri i Jashtëm i Greqisë ka hedhur poshtë çdo zë për një luftë me Turqinë, artikulim i cili është bërë pak kohë më parë nga ministri i Mbrojtjes, Panos Kamenos.
Në një intervistë për revistën gjermane, Der Spiegel, kreu i diplomacisë greke ka deklaruar se vendi i tij nuk po përgatitet për luftë me askënd.
“Jo, jo. Nuk ka alternativë tjetër veç paqes dhe bashkëjetesës paqësore. Por kjo nuk do të thotë se nuk marrim parasysh sjelljen e kujtdo fqinji dhe se si e trajton problemin e fqinjësisë. Te të gjithë fqinjët, dhe te familjet më të mira, ka probleme.
Duhet të zgjidhen në mënyrë diplomatike, paqësore dhe mbi bazën e të drejtës ndërkombëtare”, ka deklaruar Kotzias.
Gjithsesi, ai ka thënë se vendi i tij po përforcon armatimet.
“Mbi bazën e mundësive tona ekonomike, po blindojmë mbrojtjen tonë. Kemi efektivë të mirë dhe armë të mira. Gjashtë nëndetëset gjermane janë një armë e tmerrshme detare. Turqia investon në projekte të mëdha, si blerja e aeroplanmbajtëseve, mirëpo Greqia ka 2 mijë ishuj”, shtoi më tej ai.
Kotzias nuk ngurroi ta quajë arrogant presidentin turk Erdogan, për të cilin tha se nuk mendon që të ketë idenë e ndryshimit të kufijve.
