Është publikuar lista zyrtare e kombëtares shqiptare për dy miqësoret e e këtij muaji ndaj Kilit (22 mars) dhe Suedisë (25 mars).
Trajneri Silvinjo ka grumbulluar 26 lojtarë ku ka suprizuar jo pak me emrat ftuar. Janë 4 lojtarë që rikthehen në kombëtar, një që vjen për herë të parë, teksa kanë mbetur jashtë liste Arbnor Muja dhe Mirlind Daku.
Silvinjo ka rikthyer në kombëtare sulmuesit Armando Broja dhe Rey Manaj, të cilët nuk kanë luajtur në asnjë prej ndeshjeve eliminatore, mbrojtësin Marash Kumbulla, që ishte titullar vetëm në ndeshjen e parë në Poloni dhe më pas pësoi një dëmtim të rëndë dhe anësorin e majtë Naser Aliji, i cili mungonte prej vitesh në skuadrën kuqezi.
Manaj po kalon një formë të shkëlqyer në Turqi, ku shënon rregullisht dhe me të gjitha mënyrat me fanellën e Sivasspor, ndërsa Broja dhe Kumbulla janë rikuperuar plotësisht dhe po shtojnë gjithnjë e më shumë minutat në këmbët e tyre. Dy ndeshjet e radhës do të jenë një test për ta, për të treguar se dinë të bëhen pjesë e grupit pa shkaktuar rrëmujë dhe se kanë shumë për të dhënë me fanellën kuqezi.
Ndërkohë risia është sulmuesi 25-vjeçar i Dinamos së Zagrebit, Arbër Hoxha. Ky i fundit luan si sulmues i majtë dhe në janar u transferua nga Slaven Belupo te Dinamo Zagreb, teksa këtë sezon në Kroaci numëron 4 gola të shënuar dhe një asist.
LISTA
Përsa i përket portës janë të njëjtët futbollistë, Etrit Berisha, Thomas Strakosha dhe Elhan Kastrati.
Në mbrojtje veç rikthimit të Marash Kumbullës, emrat e tjerë që përbëjnë repartin e prapavijës janë Berat Gjimshiti, Elseid Hysaj, Ivan Balliu, Enea Mihaj, Federic Veseli, Jon Mersinaj, Mario Mitaj dhe Naser Aliji.
Ashtu si në portë edhe në mesfushë janë të njëjtët lojtarë Ylber Ramadani, Kristjan Asllani, Qazim Laçi, Keidi Bare dhe Nedim Bajrami.
Ndërsa në repartin e sulmit ka risi por edhe rikthime, ku emrat që e përbëjnë janë Taulant Seferi, Myrto Uzuni, Ernest Muçi, Jasir Asani, Arbnor Muçolli, Sokol Cikalleshi. Arbër Hoxha, Rey Manaj dhe Armando Broja.
Trajneri Silvinjo do të dalë në një konferencë për mediat nesër në orën 11:00 për të folur në lidhje me listën dhe dy ndeshjet miqësore të Shqipërisë ndaj Kilit dhe Suedisë.
Grumbullimi i lojtarëve do të nisë që të dielën në Tiranë me futbollistët që do të përfundojnë më herët impenjimet me skuadrat e tyre, ndërsa grupi i lojtarëve do të jetë i plotë të hënën më datë 18 mars. Seancat stërvitore do të zhvillohen në “Shtëpinë e Futbollit”, ndërsa të enjten kuqezinjtë do të udhëtojnë drejt Parmës, aty ky më 22 mars do të luhet edhe ndeshja e parë miqësore ndaj Kilit në stadiumin “Ennio Tardini”, duke nisur nga ora 20:45.
Pas sfidës me Kilit, Kombëtarja do të luajë një tjetër përballje miqësore me Suedinë. Kjo ndeshje do të zhvillohet më 25 mars në stadiumin “Friends Arena“ të Stokholmit në Suedi, në ora 19:00.
