I ftuar në emisionin “Elite Show” në SuperSport, Migen Memelli komentoi edhe emërimin e Erbim Fagut si trajner i Tiranës.
Ish-sulmuesi, theksoi se kjo zgjedhje e Fagut është delikate, por edhe kurajoze ndërsa shtoi se ai mund të përmirësojë fazën mbrojtëse të kryeqytetasve.
“Është sa kurajoze aq edhe delikate. Është eksperienca e parë, është marrë me moshat më parë. Ajo çka do ta ndihmojë është situata e Tiranës. Skuadra nuk është në lartësinë e duhur dhe Fagu mund të përmirësojë një aspekt si faza mbrojtëse.
Tirana është skuadra e dytë që ka pësuar më shumë dhe njëkohësisht e dyta që ka shënuar më shumë. Më e lehta është të rregullohet mbrojtja, edhe pse ka probleme në prapavijë me mungesën e Najdovskit.
Është në katërshen e Kupës, në garë për “final 4”. Fagu duhet të rregullojë disa gjëra si mbrojtja dhe nëse ia del në këto atëherë mund të quhet një punë e mirë. Kaq mund të bëjë në këtë situatë”, u shpreh Memelli.
