Torino-Inter sapo kishte përfunduar, me vërshëllimën e trefishtë të gjyqtarit Taljavento. Vendësit po festonin fitoren (1-0) dhe dy trajnerët i afrohen njëri-tjetrit për të shtrënguar duart. Luçiano Spaleti, megjithatë, i mban dorën (thuajse me forcë) homologut dhe shfaq një grimasë të çuditshme, që më pas e shpjegon kështu: “Dialogu me Maxarrin në fund? Ai shqetësohet gjithmonë edhe kur fiton. Ndaj i thashë që ndeshjen e kishte fituar dhe pikë. I thashë: ‘Nëse do të ma japësh dorën, ma jep. Jo me majën e gishtave’. Nuk e kërkoj asnjëherë polemikën”.
GOLI, AS ME “BOMBË”… – Më pas, trajneri riktheu vëmendjen te skuadra: vetëm disa orë më parë (në konferencën për shtyp të pragndeshjes) kishte deklaruar se për Interin e tij ishte gjetur kura. Por, kundër Torinos ka ardhur “stop”-i i radhës. E këtë herë trajneri zikaltër e ka kapur me fatin: “Ka disa raste kur topi nuk hyn as sikur të bjerë ‘bomba’, ka nënvizuar për mikrofonat e “Sky Sport”.
– Patëm, megjithatë, më pak pastërti në qarkullimin me topin dhe duhet ta menaxhonim më mirë, pësuam disa kundërsulme si tepër që na detyruan të shpenzonim energji”. Rasti i dytë i çuar dëm pas derbit: çfarë mungoi? “Sirigu u tregua shumë i zoti, ata zhvilluan një ndeshje të kujdesshme në fazë difensive dhe nuk lejuan thuajse asnjë krosim në zonë. Kundërshtarët i kemi pasur të fortë, nuk është e lehtë kur gjërat shkojnë edhe ters”.
Dhe, mendimin e fundit e thelloi për “Inter TV”, ku shtoi: “Mund të punohet në çdo front, por është e vështirë të analizosh gjithç- ka. Nëse nga 10 raste në 2 fati të del kundër, shkon kështu: duhet të mësosh të humbasësh e të shikosh përpara. Tanimë pikët vlejnë ‘dyfish’, ndaj pas kësaj ndalese duhet të ringrihemi duke fituar të radhës. Nuk mund të bëjmë llogari”.
PANKINA E RAFINJËS – Trajneri toskan ka shpjeguar edhe arsyet e lënies në stol të Rafinjës. “Vjen nga dy sezone i ndalur në ‘bokse’ dhe këtë javë luajtëm tri ndeshje. Të mërkurën madje më ishte dukur në mungesë energjish, ndaj vendosa ta aktivizoja në momentin kur mund të bënte një diferencë në lojë (dhe, teorikisht, braziliani ndryshoi Interin)”.
