Ambasadori amerikan nuk e ka fshehur asnjëherë dashurinë që ka për ish-ministrin e Brendshëm, Saimir Tahiri, aktualisht nën hetim si pjesë e një grupi kriminal narko-trafikantësh.
Me gjuhë diplomatike, Lu i është gjendur në krah Tahirit, si në kohën kur në pozicionin e Ministrit të Brendshëm ishte nën denoncimet e opozitës, ashtu edhe sot që është nën akuza nga Prokuroria.
Në intervistën e dhënë pak ditë më parë në “Opinion”, Donald Lu e tregoi sërish afërsinë e tij me Tahirin, nëpërmjet shprehjeve të nënkuptuara. Ai tha se “çështja kundër Saimir Tahirit meriton të vendoset nga një gjykatës, jo të vendoset nga politikanët, jo të vendoset nga prokurorët që nuk bëjnë punën, por duhet të vendoset nga një gjykatës që do të shohë me transparencë provat e çështjes.…”. Pra, përtej rolit të tij diplomatik, ai vuri në dyshim provat e Prokurorisë, pavarësisht faktit se ato i kanë në dispozicion vetëm prokurorët e çështjes.
Kjo mbështetje me gjuhë diplomatike nuk është e para që ka dhënë Donald Lu për Saimir Tahirin, pas publikimit të përgjimeve të Prokurorisë së Katanias për bandën “Habilaj”.
Një ditë pasi maxhoranca votoi në Parlament kërkesën e Prokurorisë për arrestimin e Saimir Tahirit, Donald Lu u kujtoi shqiptarëve periudhën e komunizmit, kur njerëzit arrestoheshin pa prova. Një nëntekst i qartë se Prokuroria, sipas Donald Lu, po e kryqëzonte Saimir Tahirin pa prova. Ndërkohë që provat ishin evidente nga hetimet e një prokurorie të huaj, asaj italiane.
Donald Lu arriti kulmin e mbështetjes së tij për Tahirin në Prill 2016, kur, nëpërmjet lobimit të tij personal, e uli ish-ministrin e Brendshëm në Zyrën Ovale, në takim me Presidentin Barak Obama.
Në atë kohë, Tahiri ishte në syrin e ciklonit publik, për shkak të kanabizimit të vendit. Ndërkohë, ajo që nuk dihej në atë kohë nga publiku shqiptar, por jo nga Lu, ishte fakti që Tahiri rezultonte në hetimet e Prokurorisë së Katanias, si person i përfshirë në narko-trafik. Donald Lu, në analet e diplomacisë amerikane, rezulton si ambasadori që organizoi takimin e Presidentit të SHBA me një person që dyshohet se ka krijuar lehtësirat për trafikimin e tonelatave të drogës.
Përtej kësaj “arritjeje”, Lu dështoi më tej që të organizonte takime të nivelit të lartë të Tahirit me zyrtarë amerikanë. Ai nuk arriti të bindte shefin e CIA-s, John Brennan, që të shtrëngonte dorën me Saimir Tahirin, gjatë një vizite në Tiranë, në dhjetor 2016. Brennan, i cili zhvilloi një biesë me ish-kreun e shërbimeve sekrete, Visho Ajazi, refuzoi kërkesën dhe lobimin e Donald Lu për të zhvilluar një takim me Tahirin.
Në shkurt 2017, Donald Lu dështoi të realizonte takimin e Tahirit me kreun e Antimafias Italiane, Franko Roberti, i cili ishte në Tiranë për një takim me Prokurorin e Përgjithshëm. Burime diplomatike shprehen se Lu, nëpërmjet ambasadorit italian në Shqipëri, Albert Cutillo, kërkoi që Saimir Tahiri të takohej me Franko Robertin. Por ky i fundit e përjashtoi nga axhenda e tij takimin me Ministrin e Brendshëm, pasi ishte i informuar nga vartësit e tij të Katanias se Tahiri rezultonte si i përfshirë në narko-trafik.
