Pas shkarkimit të Alessio Dionisit, Sassuolo nuk i besoi gjatë as ndihmësit të tij Bigica, pasi humbja e thellë 1-6 ndaj Napolit tregoi se as ai nuk ishte në gjendje të ndryshojë situatën në skuadër.
Klubi emilian ka arritur një marrëveshje me Davide Ballardinin, trajner 60-vjeçar italian, i cili njihet edhe si një ekspert shpëtimi, pasi ia ka dalë të mbajë në Serinë A disa skuadra, drejtimin e të cilave e ka marrë në momente kritike.
Problem ishte fakti që Ballardini drejtonte Cremonesen, por klubi i Serie B pranoi dorëheqjen e tij. Ndërkohë që ka ardhur edhe zyrtarizimi i tij te Sassuolo, me misionin për të mbajtur skuadrën në elitën e futbollit italian.
Vlen të theksohet se te Sassuolo aktivizohen edhe dy futbollistë të Kombëtares shqiptare, Nedim Bajrami që është titullar dhe Marash Kumbulla, i cili debutoi vetëm të mërkurën, duke u rikthyer në fushë pas një dëmtimi që e mbajti larg futbollit për 10 muaj.
