Kristiano Ronaldo nuk do t’ia dijë për barriera, sidomos kur bëhet fjalë për ndeshje ndërkombëtare, që zhvillohen nga UEFA. Në Torino dhuroi një perlë të vërtetë, që do të shënohet në librat e artë të futbollit. Këtë qytet e futi në listën e atyre ku ka shënuar të paktën 2 gola. Ishte qyteti i 26-të europian dhe i pari në Itali ku shënoi për herë të parë dy gola, diçka që në fakt e ka arritur në më shumë se 50 raste.
“Pushtues”- Kristiano Ronaldo është një pushtues. Ka luajtur në 76 qytete të Europës me katër fanellat e karrierës së tij (Sporting Lisbonë, Mançester Junajtid, Real Madrid dhe kombëtaren e Portugalisë) dhe në 45 prej tyre ka shënuar gol. Ai ka lënë shenjë në 60% të këtyre qyteteve, duke festuar të paktën një gol në kompeticionet që zhvillohen nga UEFA. Qytetet ku ka shënuar më shumë janë Madridi (53 gola në 49 ndeshje), pastaj renditet Lisbona (14 gola në 26 ndeshje), Mançesteri i treti (9 gola në 27 ndeshje) dhe Oporto e katërta (8 gola në 11 ndeshje). Ylli portugez i Realit ka luajtur në 40 shtete të ndryshme të Europës dhe janë 26, ata te të cilët ka shënuar. Shteti më i preferuar i tij është Holanda, ku ka shënuar 5 gola në 2 ndeshje kundër Ajaksit.
Shqipëria makth- Por jo kudo ku shkel Ronaldo ka fat dhe sukses. Toka e mallkuar për portugezin është Shqipëria. Fituesi i “Topit të Artë” ka luajtur në Shqipëri 2 ndeshje me fanellën e kombëtares së Portugalisë, por nuk ka arritur kurrë të gjejë rrugën e rrjetës. Ndeshja e luajtur në Tiranë (Qemal Stafa) në qershorin e vitit 2009-të, e vlefshme për eliminatoret e Botërorit 2010- të, përfundoi 1-2 për Portugalinë me golat e Hugo Almeidës dhe Bruno Alveshit në minutën e fundit.
Por Ronaldo nuk shënoi dot as në “Elbasan Arena”, aty ku skuadra e tij mori një fitore minimale në rrugëtimin për në Francë, por që në fakt nuk e prishi dot ëndrrën kuqezi për t’u kualifikuar në “Euro 2016”. Në atë ndeshje ishte sërish një gol në minutat e fundit dhe autori ishte Migel Velozo. Në të dyja ndeshjet ai ka qenë i kontestuar nga tifozëria. Në “Qemal Stafa” tifozët kuqezi kishin hapur një pankartë “Ronaldo Miss World 2010”, si për t’i thënë që Shqipëria do ta linte jashtë Botërorit, ndërsa në Elbasan i bërtitën shpeshherë: Mesi, Mesi. Por në fakt, vendi ynë renditet i dyti në listën e shteteve ku portugezi nuk arrin të shënojë. Në vendin e parë është Hungaria, ku CR7 ka luajtur 3 ndeshje dhe nuk ka shënuar asnjëherë. /PanoramaSport
